Дваесет и тројца руски милијардери кои се рангираа меѓу 500-те најбогати луѓе во светот имаа нето богатство од 339 милијарди долари на 23 февруари 2022 година, еден ден пред силите на Владимир Путин да ја нападнат Украина.
Една година подоцна, руските богати и моќни изгубија 67 милијарди долари од нивното колективно богатство. Станува збор за пад од 20 проценти што е повеќе од четири пати поголем од останатите на индексот на милијардери на Блумберг.
Најголем губитник е Алексеј Мордашов, главниот сопственик на „Северстал“ (Severstal PJSC), еден од најголемите руски производители на челик. Тој изгуби 6,7 милијарди долари по инвазијата на Русија. Со проценети 19,8 милијарди долари, тој сè уште е четвртиот најбогат човек во земјата.
Вториот најголем пад му припаѓа на уште еден челичен магнат, Владимир Лисин. Претседателот на „Новолипетск“ (Novolipetsk Steel PJSC) загуби 5,8 милијарди долари во текот на изминатата година, со што неговото богатство се намали на 20,5 милијарди долари.
Спротивно на тоа, Андреј Гурјев доби 2,1 милијарда долари од почетокот на војната благодарение на порастот на цената на акциите на „ФосАгро“ (PhosAgro PJSC), еден од најголемите производители на фосфатни ѓубрива во Европа. Тој е основач на компанијата, а неговото семејство е нејзин најголем акционер.
Сепак, анализата на руските ултра богати сугерира дека неколкуте рунди санкции од САД, Велика Британија и Европската унија имале ограничен долгорочен ефект. Всушност, колективното нето богатство на милијардерите го достигна дното само неколку недели по инвазијата, намалувајќи се од 92 милијарди долари на 248 милијарди долари на 9 март 2022 година.
Роман Абрамович беше принуден да ги стави на продажба своите скапоцени имоти во Лондон, вклучувајќи го и фудбалскиот клуб Челзи. Михаил Фридман рече дека е „во шок“ откако неговиот адвокат му кажал дека санкциите значат забрана за патување и замрзнати сметки. Во случајот на Виктор Векселберг, Шпанија, по налог на САД во април, ја заплени неговата суперјахта Танго долга 78 метри и вредна 90 милиони долари.
Од неодамна, американските власти бараат уметнички дела што биле купени или продадени од ултра богати руски тајкуни. Абрамович, Векселберг и Андреј Мелниченко беа меѓу именуваните во поканите на федералните обвинители во Њујорк кои бараат од високите аукциски куќи да ја достават целокупната документација за изминатите години, објави Bloomberg News претходно овој месец.
.webp){kind=icon}
Во моментов нема коментари за веста. Биди прв да коментира...