Новите економски показатели покажуваат дека Европската централна банка (ЕЦБ) треба повторно да ги зголеми каматните стапки на следниот состанок, закажан за 4 мај, изјави главниот економист Филип Лејн за францускиот весник „Ле монд“ (Le Monde).
„Тековните податоци ни кажуваат дека треба повторно да ги зголемиме стапките следната недела“, рече Лејн во интервјуто објавено во вторникот. „Сè уште не е вистинско време да му се стави крај на монетарното затегнување. Освен тоа, немам кристална топка, сè ќе зависи од економските показатели“, додаде тој.
Интервјуто е објавено нешто повеќе од една недела пред следниот состанок на ЕЦБ, на кој ќе одлучуваат за каматната стапка, а е во согласност со забелешките и согледувањата на другите носители на одлуки, кои исто така сугерираат дека е сè поизвесно уште едно зголемување на стапката на депозитите на ЕЦБ. Единствената непозната е всушност колкаво ќе биде покачувањето.
Дали ќе биде четвртина или половина поен зависи од инфлацијата и бројките на банкарските заеми два дена пред да се донесе одлуката. Официјалните лица во моментов ги даваат последните забелешки пред да влезат во период на молк в четврток.
Лејн за „Ле монд“ не откри колкаво зголемување на каматните стапки сака, наместо тоа изјави дека „анализата сугерира дека би било несоодветно да ја задржиме нашата депозитна стапка на сегашното ниво од три проценти“.
Од друга страна, коментарите дадени во понеделникот од страна на гувернерот на Банката на Франција, Франсоа Вилерој де Галхау, сугерираат дека тој сигурно би сакал помало зголемување на каматните стапки од ЕЦБ, како и инвеститорите на пазарот на пари, кои го гледаат таквиот исход како поверојатен.
Сепак, според членката на Извршниот одбор на ЕЦБ, Изабел Шнабел, опцијата за позначително зголемување на каматните стапки останува на маса.
„Инфлациските притисоци остануваат во одредени сектори на економијата, но попуштаат кај други. Мислам дека не сме во ситуацијата во која бевме во 1970-тите, кога инфлацијата всушност беше огромна и силна“, рече Лејн и заклучи со коментар да се избегне таквата позиција: „Важно е ЕЦБ да ги зголеми каматните стапки за да се осигури дека инфлацијата навреме ќе се врати на целта од два процента“.
.webp){kind=icon}
