Еврозоната сепак избегна зимска рецесија

Економијата на еврозоната сепак избегна зимска рецесија, бидејќи ревидираните податоци покажуваат дека на почетокот на годинава нејзината економија стагнирала, па не се остварени два последователни месеца на пад на бруто-домашниот производ.

Производството во 20-члената монетарната унија останало непроменето во првиот квартал, според ажурираните податоци објавени од „Евростат“ во четвртокот. Ова е повисоко од првично проценетите -0,1 отсто, поради што беше пресметано дека еврозоната влезе во првата техничка рецесија по пандемијата.

Квартални движења на БДП на еврозоната од 2020 година. Стапката на раст за првиот квартал од 2023 година е променета од -0,1 отсто на 0 Bloomberg

„Без разлика дали еврозоната влезе во рецесија или не во текот на зимата, изгледите остануваат мрачни и укажуваат на економска слабост“, вели Џејми Раш, главен економист за Европа во „Блумберг економикс“ (Bloomberg economics). „Слабеењето на ефектите од шокот во енергетскиот сектор дава простор за заострување на монетарната политика. Тоа ќе ја забави економијата до крајот на годината“, додаде тој.

Преработувачкото производство беше најголем товар за економскиот раст. Инфлацијата го оптоварува и регионот, иако стапката на раст на цените е речиси преполовена во однос на октомвриските 10,6 отсто. Европската централна банка (ЕЦБ) најверојатно следната недела повторно ќе ги зголеми трошоците за задолжување.

Во моментов нема коментари за веста. Биди прв да коментира...

Остави коментар