Портпаролката на Белата куќа, Каролин Левит, соопшти дека потпретседателот Џеј Ди Венс ќе ја предводи американската делегација во Исламабад, во која ќе бидат и специјалниот пратеник Стив Виткоф и Џаред Кушнер, на првата рунда разговори со Иран која ќе се одржи во сабота наутро по локално време во Вашингтон.
Во меѓувреме, претседателот на иранскиот парламент, Мохамад Багер Галибаф, ги обвини САД за прекршување на двонеделниот договор за прекин на огнот веќе по првиот ден.
„Во ваква ситуација, билатерален прекин на огнот или преговори се неразумно решение“, посочи тој во соопштение на социјалната мрежа Х.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Македонија меѓу земјите со највисок раст на цените на становите во Европа
Македонија е шеста земја во Европа според високиот раст на цените на становите во последните пет години. Ако растот на цените се приспособи на инфлацијата, земјава се искачува две места погоре, четврта е во Европа, покажуваат податоците на меѓународната веб-страница специјализирана за недвижности globalpropertyguide.com.
„Пазарот на недвижности во Македонија останува жив, поткрепен со силна побарувачка, раст на станбената изградба и поволни економски трендови, при што урбаните области бележат најсилен раст и највисоки вредности на имотите“, се наведува во извештајот за 2025 година.
Според оваа анализа на движењата на цените на недвижностите во земјава, цените лани се зголемиле за значителни 24,98 отсто во споредба со една година претходно. Ова претставува второ највисоко годишно зголемување на цените на недвижностите во последните години.
Ротација кон дефанзивен сектор?
Додека глобалната економија се справува со геополитички тензии на Блискиот Исток (и покрај примирјето), потенцијални флуктуации на каматните стапки и неизвесни проекции за раст, прашањето за ротација на портфолиото повторно излегува на виделина.
Дефанзивните сектори, како што се малопродажбата на производи за широка потрошувачка, производителите на храна и пијалоци и давателите на комуналните услуги, историски гледано, биле поотпорни на економски падови. Причината е едноставна: нивните производи и услуги се од суштинско значење. Без разлика каква е моменталната состојба на економијата, луѓето ќе продолжат да купуваат храна, лекови и ќе плаќаат за електрична енергија.
Tокму дефанзивните сектори изгубија многу помалку вредност за време на финансиската криза во 2008 година, каде што секторот „потрошувачки производи“ (Consumer staples) падна за 14 проценти, секторот „комунални услуги“ (Utilities) за 28 проценти, додека поширокиот индекс S&P 500 изгуби дури 36 проценти од својата вредност во текот на годината. Сличен модел гледаме и денес.
Имаа ли инсајдерски информации оние што на Полимаркет се обложија на примирје?
Обложувањата за прекин на огнот меѓу САД и Иран насочија повеќе од 170 милиони долари преку Полимаркет (Polymarket), што претставува еден од најголемите геополитички облози во кратката историја на пазарите за прогнозрање. Сега исходот ја отвора истата дилема која со месеци ја следи оваа платформа: дали корисниците тргуваат врз основа на внатрешни информации и дали платформите можат јасно да исплатат договори за кои посредуваат.
Серија навремени облози за Иран поставени од неодамна отворени анонимни налози на Полимаркет генерираа стотици илјади долари профит досега, што ги поттикна аналитичарите да ја испитаат трговијата барајќи знаци на внатрешно тргување. Некои исплати на облози поврзани со Блискиот Исток сега се замрзнати поради спор, додека корисниците дебатираат за тоа што се смета за „прекин на огнот“.
Европските акции забележаа најголем годишен раст
Европските акции скокнаа најмногу во една година, откако инвеститорите се нафрлија на купување по договорот меѓу САД и Иран за двонеделно примирје во замена за повторно отворање на Ормускиот Теснец од страна на Техеран.
Индексот Stoxx Europe 600 порасна за 3,8 отсто, што е најголем дневен раст од април 2025 година. Акциите кои најмногу паднаа за време на војната забележаа најголеми добивки. „Изи џет“ и „Туи“ скокнаа за повеќе од 10 отсто, при што акциите од секторот патувања и туризам го предводеа растот на индексот. Единствениот сектор во минус беше енергетиката.
Договорот купува време за САД и Иран да постигнат подолгорочен договор за крај на конфликтот кој предизвика глобална енергетска криза.
Можат ли САД законски да го разрешат Трамп?
Како актуелниот американски претседател би можел законски да се отстрани од функцијата? Повеќето луѓе слушнале за постапката на импичмент (англ. impeachment), овластување со кое располага американскиот Конгрес, иако ретко се користи.
Но постои и 25-от амандман на Уставот на Соединетите Американски Држави, кој овозможува претседателот да биде сменет во вонредни околности. Расправите за активирање на овој амандман нагло се засилија како одговор на постапките на претседателот Доналд Трамп во конфликтот со Иран. Повеќе истакнати политички личности предложија повикување на амандманот за да се отстрани Трамп од власт, а откако се закани со уништување на целата иранска цивилизација.
Порано во 2026 година неколку демократски пратеници се залагаа за користење на амандманот за да се смени Трамп поради неговото непредвидливо однесување поврзано со Гренланд. Прашањето за користење на овој амандман против Трамп се појавуваше и за време на неговиот прв мандат.
.webp){kind=icon}
