Прогнози: Битката со инфлацијата ќе трае уште две години

Статистиката ја избриша матната шофершајбна на Европската централна банка (ЕЦБ). Последните податоци на Евростат, европската статистичка служба, покажаа дека во август стапката на инфлација не мрднала во однос на јули - изнесува 5,3 отсто. Последен пат се намали во јуни, кога изнесуваше 5,5 отсто.

Пред да стане целосно јасно дека стапката на инфлација и натаму е над пет отсто, Изабел Шнабел, членка на извршниот одбор на ЕЦБ, рече дека шофершајбната на централната банка е заматена и дека ќе бидат потребни рестриктивни стапки за да се скротат потрошувачките цени. Следниот состанок на банката е за две недели.

Навестување за тоа дека инфлацијата не забавува беа прелиминарните податоци од четирите најголеми европски економии. Во Германија забавувањето во август не е според плановите, во Шпанија и Франција стапката се зголеми, намалување бележи само Италија.

Прелиминарните податоци за август покажаа дека најголем придонес за тврдоглавоста на инфлацијата имаат цените на храната. Цените на енергентите се намалуваат.

Трошоците за задолжување да останат високи

Според аналитичарите, тврдоглавоста на инфлацијата сега е диктирана од домашни фактори. Еден од нив се тесните пазари на трудот. Затоа, според стратегот на „ЏП Морган Асет“, Карен Вард, малку е веројатно дека западните економии ќе ја избегнат инфлацијата без рецесија.

„Мислам дека веројатноста за рецесија сè уште е голема“, истакна Вард. „Тоа е она што ќе нè ослободи од инфлацијата“.

Таа смета дека поради ваквите услови на пазарите, трошоците за задолжување треба да останат високи.

„Пораката е дека не сме уверени дека работата е завршена, не сме сигурни дека одржливо се враќаме на два отсто“, рече Вард. „Сè додека не биде навистина јасно дека активноста го олабавува пазарот на трудот, дека притисоците на платите се намалуваат, не можеме да бидеме сигурни дека се вративме на два отсто. Така, тоа нè остава во повисока зона подолго време“.

Навикнувањето на идејата за повисоки каматни стапки на подолг рок влијае и на друг индикатор во еврозоната. Индикаторот на расположението објавен од Европската комисија падна на 93,3 од 94,5 во јули. Тоа е четврти месечен пад и е полош од просечната прогноза во анкетата на економистите на „Блумберг“. Намалени се и подиндикаторите за услугите, индустријата и очекувањата на потрошувачите. Овие индикатори ги замаглуваат изгледите за растот во регионот.

Целните два отсто дури по 2025 година

Според проекциите достапни на терминалот на „Блумберг“, оваа година бруто-домашниот производ во еврозоната ќе изнесува 0,6 отсто, а идната година ќе се продлабочи на 0,9 отсто. Проекциите на ЕЦБ се пооптимистички. Според нив, идната година растот ќе изнесува 1,5 отсто.

Понатаму, проекциите за инфлацијата до крајот на годината се дека таа ќе остане на исто ниво како сега (5,5 отсто) во услови на висока базична инфлација од 5,1 отсто. Базичната инфлација идната година ќе биде повисока од инфлацијата. Според проекциите на централната банка, во 2025 година инфлацијата ќе падне блиску до целта и ќе изнесува 2,2 отсто.

 

 

 

 

Во моментов нема коментари за веста. Биди прв да коментира...

Остави коментар