.webp){kind=icon}
Проблемите на најголемата европска економија би можеле да бидат од подолгорочна природа. Економистите проценуваат во тековниот квартал економската активност во Германија повторно да се намали. Месечното истражување на „Блумберг“ со економистите покажува дека бруто-домашниот производ сега се очекува да се намали за 0,1 отсто од јули до септември, со прогноза за намалување и за последниот квартал од годината, пишува „Блумберг“. Првично, економистите предвидуваа стагнација за тековниот квартал.
Земјата, која некогаш беше мотор на Европа, сега го кочи својот раст, а причина за проблемите се и заладувањето на побарувачката во Кина и долгорочната енергетска криза. Претседателот на Бундесбанк, Јоаким Нагел, минатата недела ги отфрли сугестиите дека земјата повторно ја заслужува ознаката „пациентот на Европа“ што ѝ беше прикачена во 1990-тите. Третиот квартал започна со најголем месечен пад на фабричките нарачки од пандемијата во 2020 година. Следниот ден податоците покажаа дека индустриското производство опаднало и во јули. Кога податоците беа ревидирани, растот на БДП во еврозоната меѓу април и јуни исто така беше само 0,1 отсто.
Bloomberg Mercury
На овој податок ќе обрнат внимание и членовите на Советот на Европската централна банка (ЕЦБ), кои ќе се состанат в четврток и ќе одлучуваат за евентуално ново зголемување на каматните стапки.
Додека „Блумберг“ предвидува дека германската контракција ќе биде само умерена овој квартал, другите економисти се попесимисти, прогнозирајќи пад на БДП од 0,5 отсто, проследен со дополнителен пад од 0,2 отсто во последниот квартал, што ќе ја врати Германија во рецесија.
„Глобалниот пад на производството сега силно ја погодува Германија“, се наведува во извештајот во петокот. „За разлика од Германија, повеќето земји од еврото што се најдоа во криза во минатото релативно добро се справуваат со сегашното заладување на економијата“.
Инфлацијата останува видлива, расположението ниско
Во исто време, инфлацијата не се лади. Стапката на инфлација во Германија, мерена како промена на годишно ниво на индексот на потрошувачките цени (CPI), изнесуваше 6,1 отсто во август 2023 година, објави германскиот завод за статистика. Во јули 2023 година беше 6,2 отсто. Потрошувачките цени се зголемија за 0,3 отсто во август 2023 година во споредба со јули 2023 година.
Сегашната деловна ситуација на германската автомобилска индустрија е исто така полоша од минатиот месец, според институтот „ИФо“ (Ifo). Показателот падна на 12,7 поени во август, што е помалку од јулските 22,1 поени. „Чувството најмногу се влоши кај производителите на автомобили, додека доставувачите сè уште се доста задоволни од својата моментална позиција“, вели Анита Волф, експертка за индустриска организација и нови технологии.
Во исто време германските производствени компании забележуваат помал недостиг од материјал. Во август, 24,4 отсто од анкетираните компании пријавиле недостиг, што е за 5,1 процентен поен помалку отколку во јули.
