ЕУ: Штедете енергија сега, за да избегнете болки подоцна

Европската унија мора да почне да дава приоритет на заштедата на енергија ова лето за да избегне намалување на потрошувачката на електрична енергија во индустријата следната зима, изјави комесарот за енергија, Кедри Симсон.

Според неа, целосното прекинување на испораките на руски гас ќе ја отежне намерата на Европа да ги пополни местата за складирање гас до прагот од 80 отсто што се бара до почетокот на ноември.

„Граѓаните и деловните субјекти во следните неколку месеци да не ги ладат зградите толку многу како претходните години за да штедат струја пред зимата. Ако има целосен прекин, мораме да дадеме приоритет на заштедите. Со превентивното штедење и промена на однесувањето, не само во индустријата, туку и кај домаќинствата во средината на зимата би можеле да избегнеме ситуација на ограничување во некои индустриски сектори.“, изјави Симсон во интервју за телевизијата „Блумберг“.

ЕУ е во состојба на готовност поради продолжено намалување на испораките на руски гас бидејќи клучниот гасовод Северен тек 1 е подложен на годишно одржување. Стравот е дека клучната гасна врска можеби нема да биде повторно вклучена кога работите ќе завршат следната недела, оставајќи го регионот да се бори за алтернативни извори. Со тоа, би се зголемила можноста за недостиг од енергија што би уништило економијата подоцна оваа година.

Комисијата треба да излезе со план за намалување на побарувачката на енергија следната недела, додека министрите за енергетика ќе се состанат на итен состанок подоцна во месецот за да разговараат за тоа како најдобро да се подготват за потенцијалниот крај на испораките на руски гас. Францускиот министер за финансии Бруно Ле Мер изминатиот викенд предупреди дека ваквото сценарио сега е најверојатно.

Тоа за возврат ги поттикна стравувањата дека блокот би можел да влезе во рецесија, со еврото блиску до паритет со доларот за прв пат од 2002 година. Пазарот на гас, исто така, сугерира дека цените би можеле да останат покачени до 2024 година, поттикнувајќи ја инфлаторната перспектива.

„Ако постои глобална побарувачка на која не одговара производството, ние сме во ситуација кога повисоките цени ќе останат подолг временски период“, рече Симсон, мислејќи на меѓународните пазари на гас.

Таа додаде дека ако се намали побарувачката односно потрошувачката, тогаш ова треба да има надолно влијание и на цени на природниот гас во Европа.

Во моментов нема коментари за веста. Биди прв да коментира...

Остави коментар