Повлечен и последниот формален потег, Хрватска го воведува еврото

Советот на Европската унија, односно Советот за економски и финансиски прашања (Ecofin), денеска даде знак за почеток на одбројувањето до последните месеци на хрватската куна, плаќање во евра и дефинирање на точниот курс по кој ќе се врши змена.

На Хрватска ѝ е одобрено да го воведе еврото од почетокот на следната година. Официјалниот курс е 7,53450 куни за едно евро и не е променет во однос на оној што важеше за време на учеството на Хрватска во Европскиот механизам за девизен курс ERM II. Формално, ова е последниот чекор од европска страна, а Хрватска сега практично треба да го заврши најголемиот дел од работата.

Во Брисел рекоа дека најголемиот притисок ќе биде врз банките, а препорачуваат во неделите кои ќе го одбележат воведувањето на еврото да се зголеми бројот на вработени, дури и да се издвојат посебни шалтери наменети за размена на куни во евра, како и точно и јасно информирање на граѓаните кои банкомати имаат евра, а кои не, бидејќи технички не е можно сите банкомати да се снабдат со новата валута во исто време.

Исто така, банките ќе мора да бидат внимателни бидејќи околу новата година ќе има зголемен износ на готовина во оптек, што создава дополнителни ризици. Граѓаните и извесно време пред официјалниот почеток на користењето на еврото ќе можат да купат своевидни пакетчиња од евро монети, кои во претходните случаи се покажале како многу популарни подароци.

Така, дванаесетти јули 2022 година стана еден вид ден на еврото за Хрватска. Одлуките на Ecofin, поточно нивното објавување во официјалниот весник на ЕУ неколку дена подоцна, се иницијална каписла за активирање на Законот за воведување на еврото како официјална валута во Хрватска, донесен кон средината на мај.

Кога еврото ќе влезе во оптек на почетокот на следната година, домашните потрошувачи нема веднаш да добијат само монети со хрватски национален дизајн, туку во оптек ќе бидат пуштени и монети од некои други земји. Во Брисел велат дека хрватската централна банка преговара со некои други земји каде има вишок на монети кои не се во оптек.

Првите две недели по јануари 2023 истовремено ќе бидат во оптек куните и еврата, а продавачите би требало да враќаат евра при плаќање на граѓаните доколку можат; деловните банки се обврзани од почетокот на септември да го започнат т.н. авансно снабдување, односно централната банка да почне да им испорачува евра, кои потоа ќе ги доставуваат до нивните деловни клиенти.

Двојното прикажување на цените мора да започне најдоцна до првиот понеделник во септември годинава, иако тоа може да се направи и веднаш откако ќе се знае фиксниот курс, а цените ќе се прикажуваат во евра и куни до крајот на следната година. Во текот на целата следна година ќе може да се врши размена на готовина во банки, експозитури на Финансиската агенција (Фина) и пошти. Во една трансакција без надокнади ќе може да се заменат најмногу сто банкноти и најмногу сто монети. Нема ограничување на бројот на такви трансакции.

По првата година, во Хрватската народна банка (ХНБ) ќе може да се менуваат куни како монети во следните две години, а банкнотите ќе може да се менуваат без временско ограничување.

Во моментов нема коментари за веста. Биди прв да коментира...

Остави коментар