.webp){kind=icon}
Германската влада постигна договор за ревидираниот финансиски план за 2024 година и покрај превирањата предизвикани од минатомесечната судска одлука за ограничување на користењето вонбуџетски средства.
Канцеларот Олаф Шолц, министерот за економија Роберт Хабек и министерот за финансии Кристијан Линднер преговараа во текот на ноќта за финализирање на договорот пред Шолц да замине за Брисел, на самитот ЕУ-Западен Балкан, подоцна в среда.
Тројцата ќе одржат прес-конференција во 12 часот во Берлин, на која ќе ги објаснат деталите од договорот.
Ненадејната одлука на германскиот уставен суд на 15 ноември ја поништи децениската практика на користење специјални фондови за финансирање инвестиции и доведе во прашање десетици милијарди евра трошоци од финансирани долгови.
Трипартиската владејачка коалиција на Шолц беше принудена да го ревидира својот финансиски план за 2023 година и повторно да ги суспендира уставните лимити за задолжување, додека првобитниот буџет за следната година, одобрен од владата во јули, заглави во парламентот.
Шолц и неговите министри потоа се соочија со деликатно балансирање, бидејќи мораа да состават нов буџет за 2024 година, во согласност со пресудата на судот, без да се предизвикаат дополнителни правни спорови.
Bloomberg
Една од опциите може да биде итна суспензија на ограничувањето на нето ново задолжување петта година по ред.
Социјалдемократите на Шолц и зелените го поддржаа таквиот потег и тврдат дека тој е оправдан со трошоците поврзани со тековната војна во Украина, додека ФДП на Линднер го отфрли.
Ограничувањата за задолжување се ставени настрана почнувајќи од 2020 година за да ѝ се помогне на владата да се справи со ефектите од пандемијата и од енергетската криза.
Хаосот предизвикан од одлуката за буџетот ги вознемири инвеститорите и поттикна повици до претседателот на Бундесбанк, Јоаким Нагел, да ја разјасни ситуацијата.
Нерешените финансиски прашања и владините конфликти околу приоритетите за трошење „секогаш се лоши за финансиските пазари“, предупреди минатиот месец Нагел, член на управниот совет на Европската централна банка.
Превирањата се разгореа во време на долготрајна стагнација во најголемата европска економија. Економистите станаа попесимисти за изгледите на Германија, според месечното истражување на „Блумберг“ објавено во понеделникот. Тие прогнозираат дека производството ќе се намали за 0,2 отсто во овој квартал, двојно повеќе од претходно прогнозираниот пад од 0,1 отсто.
„Растот потоа ќе остане бавен поради спорот за буџетот и структурниот недостиг од работници“, рече Ерик-Јан ван Харн, аналитичар во „Рабобанк“.
По одлуката на судот има обновени повици за ревизија на правилата за задолжување на Германија за да се овозможат големите инвестиции потребни за транзиција кон економија што помалку загадува и е технолошки понапредна.
За таков потег ќе биде потребно двотретинско мнозинство во парламентот, а со тоа и поддршка од главните опозициски конзервативци, кои поднесоа тужба до уставниот суд на Германија, оспорувајќи ја употребата на специјалните фондови од страна на владата.
