Откако Европската централна банка (ЕЦБ) ги изненади сите со зголемувањето на каматните стапки повеќе од очекуваното минатата недела, членот на Управниот совет на ЕЦБ, Мартинис Казакс, смета дека банката можеби сè уште нема завршено со големите покачувања на стапките.
„Не би рекол дека ова ќе биде единственото големо зголемување“, рече Казакс во интервју во Франкфурт. „И во септември, зголемувањето на каматните стапки може да биде значајно“, додава тој.
Задачата на ЕЦБ е да ја скроти рекордната инфлација во еврозоната, која сега е двојно поголема од посакуваните два отсто, иако не го достигнала врвот. Инаку, во Летонија, каде Казакс е гувернер на националната банка, инфлацијата достигна речиси 20 отсто.
По повеќе од една деценија, ЕЦБ ги зголеми каматните стапки на 21 јули, со што стави крај на осумгодишната серија на ниски трошоци за задолжување. Запрашан дали ќе има уште поголем пораст во септември, можеби дури и од 75 базични поени како што направи ФЕД во јуни, Казакс рече дека апелира до ЕЦБ да има отворен поглед на работите.
„Со оглед на неизвесноста, динамиката на инфлација и многуте ризици, би рекол дека ЕЦБ треба да биде отворена за дијалог“, рече тој во петокот и нагласи дека ЕЦБ не треба лесно да ја следи политиката на ФЕД.
Bloomberg
Казакс не сакаше да зборува за можните сценарија за состанокот во октомври, но рече дека нема големи забелешки на најновите пазарни прогнози за зголемување од 150 базични поени до следниот јуни. Сега, сепак, тие прогнози се намалени на 130 базични поени.
„Постојат значителни ризици кои не се дел од основното сценарио“, рече тој. Главниот е снабдувањето со енергија од Русија, кое Кремљ го ограничи како одговор на западните санкции воведени поради инвазијата на Украина.
Изгледите за рационализација на природниот гас оваа зима ја нагризуваат и онака разнишаната доверба. Со прекини во синџирот на снабдување и најбрзорастечка инфлација од воведувањето на еврото, стравувањата од рецесија се сè поизразени.
Bloomberg
„Русија ги користи резервите на енергија и храна како политичко оружје“, рече Казакс, предупредувајќи дека нејзиното мешање во снабдувањето со енергија е сè уште можно и покрај рестартирањето на „Северен тек“ по одржувањето.
Влошувањето на изгледите му наштети на еврото, кое неодамна потона на паритет со доларот за прв пат по 20 години. „Курсот не е наш фокус, но девизниот курс е важен елемент што ја движи инфлацијата. Сепак, премногу слабото евро е проблем“, рече Казакс.
.webp){kind=icon}
Во моментов нема коментари за веста. Биди прв да коментира...