Невработеноста во Германија со помал раст, добар сигнал за економијата

Невработеноста во Германија се зголеми помалку од очекуваното во март, што е дополнителен доказ за отпорноста на пазарот на трудот во земјата што има економски проблеми. Тоа може да помогне да се поттикне скромното економско закрепнување во текот на годинава.

Невработеноста се зголеми за 4.000, додека економистите анкетирани од „Блумберг“ предвидоа зголемување од 10.000. Стапката на невработеност е непроменета и изнесува 5,9 проценти, се наведува во соопштението на Федералната агенција за труд во четвртокот.

„Економскиот пад сè уште се чувствува на пазарот на трудот“, рече шефицата на агенцијата Андреа Налес.„Генерално, сепак, пазарот продолжува да се држи релативно добро“.

Bloomberg Mercury

Германија веројатно е на крајот од плитката рецесија, оптоварена од колебливите потрошувачи, слабата надворешна побарувачка и високите трошоци за задолжување. Водечките истражувачки институти неделава предвидоа минимален раст годинава, но ниската невработеност и зголемувањето на платите остануваат меѓу факторите што стојат зад постепеното закрепнување.

Сепак, сè уште има малку докази дека растот на платите по скокот на инфлацијата навистина доведува до враќање на потрошувачката. Продажбата на мало падна четврти месец во февруари, според податоците објавени претходно во четвртокот.

„Цените остануваат високи, а геополитичката ситуација и несигурноста во домашната политика, како и постепениот пресврт на пазарот на трудот, се секако фактори што ги зголемуваат шансите германските потрошувачи да се одлучат да штедат од претпазливост“, изјави економистот на „Ај-ен-џи“ (ING) Карстен Брзески.