Германскиот извоз скокна на почетокот на годината, што е знак дека индустриската слабост што ѝ тежеше на најголемата европска економија може да се намали.
Продажбата во странство се зголеми за 6,3 отсто во јануари во однос на претходниот месец, што е далеку над сите процени во истражувањето на „Блумберг“. Увозот исто така се зголеми повеќе од очекуваното, иако трговскиот суфицит се зголеми на 27,5 милијарди евра (30 милијарди долари) - веројатен рекорд.
Една од причините за повторното заживување е извозот во Кина, кој порасна за речиси 8 отсто. Економистот на „Дојче банк“, Робин Винклер вели дека ова е „специфичен зрак на надеж“.
„И покрај сиот мрак, надворешната трговија на Германија има силен почеток во 2024 година“, рече тој.
Bloomberg
Ако трендот продолжи, тоа би можело да ја намали загриженоста дека Германија е среде рецесија предизвикана од колебливите потрошувачи и слабата странска побарувачка. Економското производство се намали за 0,3 отсто во последните три месеци од 2023 година, а Институтот за светска економија во Кил во средата предвиде уште едно мало снижување во првиот квартал.
„Блумберг економикс“ има слична мрачна перспектива. Претходно неделава ја намали својата прогноза за растот во 2024 година на само 0,2 отсто, во однос на претходното предвидување од 0,4 отсто, и порача дека слабата глобална побарувачка најверојатно ќе продолжи да влијае на трговијата.
Институтот „Ифо“ (Ifo) исто така во средата ја намали својата проекција за 2024 година на 0,2 отсто - од 0,7 отсто во јануари. За следната година, пак, ја зголеми процената за 0,2 процентни поени, на 1,5 отсто.
„Со постепеното олеснување на оптоварувањето од каматните стапки и цените и ефектите од повисоката куповна моќ на потрошувачите, економското производство ќе се забрза кон средината на годината“, рече Тимо Волмерсхаусер, шеф за економски истражувања во „Ифо“.
.webp){kind=icon}
