Активноста на приватниот сектор во еврозоната напредна на највисоко ниво во речиси една година, поттикната од растот во услужниот сектор и закрепнувањето во Германија.
Податоците во вторникот покажаа дека глобалниот индекс на менаџери за набавка на „Ес енд Пи“ се искачи на 51,4 во април, посилен од прогнозата на економистите од 50,7 и над нивото од 50, што укажува на експанзија два последователни месецa.
Германија се најде над таа клучна ознака за првпат од јуни 2023 година, пркосејќи им на очекувањата на аналитичарите.
„Позитивните бројки сугерираат дека еврозоната најверојатно ќе порасне за 0,3 отсто во вториот квартал, што е во согласност со стапката на раст јануари-март“, рече Сајрус де ла Рубија, главен економист во „Хамбург комерцијал банк“ (Hamburg Commercial Bank).
Тоа е пооптимистичка прогноза од консензусот на „Блумберг“, кој предвидува раст од само 0,1 отсто на почетокот на годината, а податоците треба да се достават на 30 април.
Bloomberg Mercury
Активноста на германскиот приватен сектор порасна за првпат по 10 месеци, благодарение на услугите. Производството продолжи да се намалува, иако со побавно темпо од претходниот месец.
„Рецесијата се чини дека во голема мера беше концентрирана во производствениот сектор, додека пошироката економија можеби за малку избегна таков пад“, вели Де ла Рубија, истакнувајќи дека услужниот сектор може да послужи како катализатор за целокупната економија.
По економската контракција во последниот квартал од 2023 година, долго се очекуваше Германија да има плитка рецесија во зимата. Сепак, „Бундесбанк“ минатата недела соопшти дека производството веројатно ќе порасне малку во првите три месеци од 2024 година поради зголемувањето на индустриското производство, извозот и градежништвото - што значи дека Германија би можела да избегне такво сценарио.
Де ла Рубија се согласува, велејќи дека моделот Наукаст (Nowcast) (процена на растот на БДП врз основа на неодамна објавените индикатори) покажува економски раст од 0,1 отсто во првиот квартал, проследен со 0,2 отсто во вториот.
Германските обврзници се движеа над кривата на принос и пазарите на пари ги намалија облозите за степенот на намалување на каматните стапки откако беа објавени податоците за најголемата европска економија. Двегодишната рочност, која е чувствителна на промени во монетарната политика, се зголеми дури за три базични поени, на 2,99 отсто.
Bloomberg Mercury
Севкупните перформанси се подобри и во Франција, каде што активноста остана главно стабилна по 10 месеци контракција. Тој развој беше поттикнат и од услугите, каде што зголемената побарувачка резултираше со првата експанзија по речиси една година.
Новите фабрички нарачки паднаа со најбрзо темпо од јануари, а како што рече Норман Либке, економист во „Хамбург комерцијал банк“, услужниот сектор останува „мотор“ на француската економија.
„Француското производство останува придушено, но очекуваме наскоро да го следи патот на услужниот сектор. Генерално, производствениот сектор засега го одложува закрепнувањето на целокупната економија“, додаде тој.
Заклучокот е дека подобриот замав во двете земји беше проследен со посилни ценовни притисоци, што потенцијално е грижа за претставниците на Европската централна банка (ЕЦБ), кои се подготвуваат за првото намалување на каматните стапки во јуни. Развојот беше фокусиран и на услужниот сектор, каде што зголемувањето на платите игра позначајна улога.
Меѓутоа, додека германските и француските услужни фирми ги зголемуваат работните места со побрзо темпо, фабриките ги отфрлаат. Но, генерално, двете најголеми економии на еврозоната не можеа да бидат во чекор со остатокот од регионот, кој се чини дека подобро закрепнува по енергетската криза и ковид.
Зголемувањето на цените на електричната енергија - предизвикано од војната во Украина - исто така ја поттикна инфлацијата, иако растот на потрошувачките цени оттогаш значително забави. Сепак, податоците од Индексот на менаџери за набавка покажуваат дека ценовните притисоци „малку се засилиле“ овој месец. Како што беше речено, се тестира подготвеноста на ЕЦБ да ги намали каматните стапки во јуни.
„Забрзувањето на зголемувањето на влезните трошоци, поттикнато не само од повисоките цени на нафтата туку и, што е уште поважно, од повисоките плати, е причина за внимание. Во исто време, компаниите во услужниот сектор ги зголемија цените со побрзо темпо отколку во март, поттикнувајќи очекувања дека инфлацијата во доменот на услугите ќе продолжи“, рече Де ла Рубија.
Сепак, тој не очекува дека тоа ќе го попречи најавеното олабавување на монетарната политика на следниот состанок на ЕЦБ.
.webp){kind=icon}
