Стагнацијата во Германија го забави растот на македонскиот БДП

Според проценетите податоци на Државниот завод за статистика, стапката на раст на бруто-домашниот производ (БДП) во четвртото тримесечје од 2023 година изнесува 0,9 проценти.

Во четвртото тримесечје од 2023 година, поголем пораст е забележан во секторите:  градежништво од 5,5 проценти и финансиски дејности и дејности на осигурување од 3,5 проценти. Финалната потрошувачка на домаќинствата, вклучувајќи ги непрофитните институции кои им служат на домаќинствата во четвртото тримесечје од 2023 година, номинално се зголемила за 5,8 проценти, а нејзиното учество во структурата на бруто-домашниот производ изнесува 70,9 проценти. Во истиот период, извозот на стоки и на услуги номинално е зголемен за 0,1 процент, а увозот на стоки и на услуги забележа намалување во номинален износ од 5,3 проценти. Бруто-инвестициите во четвртото тримесечје од 2023 година бележат намалување во делот на промената на залихите.

Од аналитичкиот тим на „Блумберг Адрија“ коментираат дека БДП во четвртиот квартал на 2023 година го продолжил трендот од остатокот од годината и пораснал за тромави 0,9 проценти во споредба со истиот квартал од претходната година.

„Растот беше генериран на крилата на домашната и личната потрошувачка (+3,3 проценти на годишно ниво во четвртиот квартал од 2023) поддржан од растот на реалните плати и државните трошења (+5,6 проценти на годишно ниво во четвртиот квартал од 2023) што не е изненадувачки бидејќи 2024 година е изборна година“, вели Марина Петров Савиќ, сениор аналитичарка за пазари во „Блумберг Адрија“.

Таа додава дека генерално, на примерот на Македонија, јасно се гледа влијанието на послабата надворешна побарувачка (особено што извозот во голема мера е насочен кон Германија, која стагнира), па и извозот стагнира во 2023 година и го загуби моментумот што го имаше во претходната година.

„Тоа доведе и до пад на увозот, па математичкиот ефект на надворешнотрговскиот сегмент беше позитивен. Сепак, за натамошно закрепнување на овој сегмент дефинитивно е неопходен побрз раст на индустриското производство и закрепнување на побарувачката од надворешно трговските партнери“, вели Петров Савиќ.

Според неа, потенцијал за тоа има во наредниот период, бидејќи имаше прилив на странски директни инвестиции и во 2023 година (околу +3,7 проценти од БДП во 2023 година).

„Македонија има потенцијал за дополнително привлекување инвестиции поради релативно расположливата и евтина работна сила, нешто за што моментално имаат потреба западните земји“, вели Петров Савиќ.