text size
Се очекува годинава туристите во Европа да потрошат 800,5 милијарди евра, што е раст во однос на минатата година од 13,7 отсто, објави Европската комисија за патувања (ETC/ETЦ) во најновиот извештај.
Тоа е меѓународна непрофитна асоцијација со седиште во Брисел, која ги обединува националните туристички организации во Европа.
Според тој извештај, странските пристигнувања пораснале за шест отсто, а ноќевањата за седум отсто во вториот квартал од оваа година во споредба со истиот период во претпандемиската 2019 година. Споредено со лани растот е 12 и 10 проценти.
Во првата половина од годината, дестинациите во јужна Европа и Медитеранот забележаа значителен пораст на пристигнувања на странски туристи во споредба со истиот период во 2019 година, при што најмногу се истакнуваат Србија (40 отсто раст), Малта (37 отсто), Бугарија (29 отсто), Португалија (26 проценти) и Турција (22 процента).
Добар напредок е забележан кај ноќевањата на странските гости и на северот на Европа, па така во Данска растот е 38 отсто, во Норвешка 18 отсто, а во Шведска девет отсто.
Кога станува збор за порастот на туристичката потрошувачка во првата половина од годината, според растот најмногу се издвојуваат Шпанија и Грција (по 25 отсто), Италија (20 отсто) и Франција (16 отсто).
За Хрватска, Бугарија и Романија се очекува зголемување на просечната должина на престој на странците во однос на 2023 година, што потоа би довело до зголемување на заработката од туризмот.
Во Хрватска растот на странските гости е 7,6 отсто во однос на првата половина од 2019 година.
Помалку познатите дестинации како Црна Гора и Албанија стануваат сè попопуларни. Во Албанија, бројот на странски гости во првите шест месеци е за 86 отсто поголем од истиот период во 2019 година, а во Црна Гора 31 отсто.
Претседателот на ЕТЦ, Мигел Санц, рече дека диверзификацијата на туристичките дестинации е охрабрувачка бидејќи ги фаворизира и новите дестинации и оние кои стануваат препосетени.
„Понатаму, зголемувањето на пристигнувањето на туристи во помалку познати области ќе им помогне на малите бизниси кои сè уште се опоравуваат од пандемијата и се борат со зголемени оперативни трошоци во сегашната економска клима“, рече Санц.
Патувањето со воз станува сè попопуларно. Од 2019 година бројот на меѓународни патници на германската национална компанија „Дојче Бан“ е зголемен за 21 отсто, а шпанската компанија „Ренфе“ извести дека за шест месеци од отворањето на меѓународната врска со Франција продала 500 илјади билети.
.webp){kind=icon}
