Најновите статистички податоци за автомобилскиот сектор во Европа покажуваат раздвижување во продажбата и позитива во месец септември за дури 9,6 отсто. По 13-месечниот пад во автомобилскиот сектор, ова е веќе втор месец по ред со раст на продажбата на нови возила. Но, инволвираните во секторот не очекуваат дека е можно до крајот на годината да се анулира наталожениот минус од претходно.
„Во септември овој раст во европски рамки беше околу 9,6 проценти, но тоа сепак не значи дека трендот за оваа година е позитивен. За 10 проценти помалку возила се продадени во првите девет месеци годинава споредено со истиот период лани“, вели за Блумберг Адриа ТВ Виктор Мизо, претседател на Асоцијацијата на странски компании со технолошки напредно производство.
Очекувањата се дека кумулативно негативата ќе се задржи до крајот на годинава. Но, Мизо покажува поголема загриженост поради тоа што бројките споредено со предпандемиската 2019 година покажуваат пад на продажбата за околу една третина.
Прочитај повеќе
Продажбата на автомобили одново под ризик
Продажбата на нови автомобили во Европа се зголеми втор месец по ред во септември, бидејќи проблемите во синџирот на снабдување се намалија.
18.10.2022
„Тоа значи дека проблемот кој до сега беше во делот на понудата поради недостатокот на чипови, сега се префрла во делот на побарувачката заради економската состојба во Европа и инфлацијата“, вели Виктор Мизо.
Иако бројките покажуваат раст на продажбата на луксузни и возила на електричен погон, сепак Мизо не е многу оптимистечен кога станува збор за вкупните бројки на продажба во автомобилскиот сектор.
„Сметам дека тој тренд на зголемени продажби на луксузни и на електрични возила ќе продолжи, но вкупниот волумен на продажба на возила или ќе е намален или во најдобар случај ќе стагнира“, проценува Мизо.
Претседателот на Асоцијацијата на странски компании со технолошко напредно производство алармира дека високата цена на струјата полека, но сигурно влијае врз профитабилснота на компаниите.
„Споредено со 2020 година во целиот обрт што го реализираме во нашата компанија во Охрид имаме зголемување на контрибуцијата на енергенси за четири и пол пати. И за тоа да го амортизираме нема многу активности на располагање. Пред се' тоа значи подобра оптимизација на работата и зголемена продуктивност“, образложува Виктор Мизо.
Погледнете го видеото со целиот разговор со Виктор Мизо за Блумберг Адриа ТВ.
.webp){kind=icon}
