Македонија се наоѓа пред своевидна совршена бура, вели аналитичарот Бранимир Јовановиќ од Виенски институт. Според него, економијата е погодена од четири фактори, инфлацијата, намалената доверба на потрошувачите и компаниите, поскапувањето на кредитите преку заострувањето на монетарната политика од страна на централната банка, како и енергетската криза.
„Знаеме дека во последната половина година инфлацијата се зголемуваше и предизвикуваше секаков хаос во смисла што ги намалуваше реалните примања на луѓето, па поради тоа што реалните примања се намалуваа се намалуваше и побарувачката во економијата, а со тоа и економската активност. Вториот канал преку кој инфлацијата негативно влијае е бизнис довербата и довербата на потрошувачите, односно луѓето и фирмите помалку сакаат да трошат затоа што неизвесноста е зголемена“, објаснува Бранимир Јовановиќ во гостувањето во Блумберг Адриа ТВ.
„Во последниот период сето тоа е надополнето со тоа што монетарните власти не само во Македонија, туку секаде и во регионот и во светот, ги покачуваа нивните каматни стапки и со тоа кредитите стануваа посккапи и понедостапни, а луѓето и фирмите кои што земале кредити со варијабилни камати треба да плаќаат повеќе и тоа задава дополнителен удар на економијата“, додава Јовановиќ.
За да ја стави ситуацијата под контрола, Јовановиќ смета дека владата треба да троши, односно да им дава пари и на фирмите и на граѓаните за да може да ја преживеат кризата и тоа, според него, е многу лесно да се каже во теорија, но во реалноста проблемот со македонската влада е што не може да си го дозволи тоа од неколку причини.
„Првата ричина е што многу доцна реагира. Сега веќе е прекасно да носите пакети за поддршка за помагање и на економијата и на граѓаните затоа што веќе е крај на година, фирмите и граѓаните се погодени веќе некое време, а второ, ако не сте ги обезбедиле парите до сега, не можете да ги обезбедите ниту сега. Така што Македонија се наоѓа во многу тешка ситуација затоа што Владата нема услови да преземе нешто многу на краток рок“, вели Јовановиќ.
„Но, тоа што може да го направи е на некој хоризонт од неколку месеци и тука првото што мора да го направи е значајно да ги зголеми своите приходи, односно да воведе прогресивен данок за државата да има повеќе пари и да може да ги поддржува и фирмите и граѓаните. Второто е да се обиде да најде поволни кредити, поволен начин на финансирање на своите потреби. И трето, мора веќе конкретно не само да размилува, туку да инвестира во енергетика“, вели Јовановиќ.
Во видео разговорот Бранимир Јовановиќ се осврнува и на конкретните последици од ударот од енергетската криза, како тоа се одразува врз индустриското производство и извозот од Македонија, а зборува и за можностите за финансирање и условите за позајмување на државата.
.webp){kind=icon}
