.webp){kind=icon}
Откако Советот на ЕУ донесе одлука за приклучување на Хрватска кон еврозоната на 1. јануари 2023 година, хрватската куна ќе биде официјално парично средство заклучно со 31. декември 2022 година.
Имајќи предвид дека хрватската куна е дел од Курсната листа на Народната банка на Северна Македонија, средниот курс за денарот во однос на хрватската куна ќе се објавува заклучно со Курсната листа којашто ќе биде формирана на 30. декември и која ќе важи на 31. декември годинава.
„Купопродажните трансакции на домашниот девизен пазар со банките и вршењето на менувачките работи со хрватски куни ќе може да се спроведуваат заклучно со 31. декември 2022 година“, информираат од Народната банка.
Во текот на 2023 година замената на хрватските куни ќе може да се реализира исклучиво кај деловните банки и кај други институции на територијата на Хрватска.
Од Народната банка исто така укажуваат дека 1. јануари 2024 година услугите за замена на хрватските куни ќе ги реализира исклучиво Централната банка на Хрватска.
