Во ваква криза, во која се наоѓаме последователно, општините се во доста неповолна ситуација - им се зголемија обврските, се зголемија нивните долгови, мораа да ги зголемат субвенциите кон јавните претпријатија, нивните приходи се намалија, а со тоа и капацитетот да овозможат соодветни и навремени услови за граѓаните, вели Борче Треновски, професор на Економскиот факултет при Универзитетот „Св. Кирил и Методиј“, според кого особено е незавидна положбата на помалите и руралните општини.
Според него, едно од решенијата за излез од ваквата состојба е поголема автономија за локалните власти.
„На тој начин ќе можат посамостојно да дејствуваат, да имаат поголем фискален капацитет и да направат повеќе. Меѓутоа, на другата страна се и капацитетите на нашите локални самоуправи, кои се доста скромни да управуваат не само со јавните финансии и капиталните проекти туку и со другите процеси“.
Во однос на тоа како да се постигне поголема фискална автономија, професорот вели дека тоа треба да се реализира преку сопствените приходи на општините.
„Може да се констатира дека има огромни дискрепанци меѓу различни општини во собраните приходи по жител. Некаде се движи од 1 до 50 пати разликата во собраните приходи по жител меѓу определени општини. Дури има и голема разлика меѓу даноците, односно сопствените приходи што ги собираат општините. Тоа покажува дека нивниот капацитет за собирање е доста скромен и треба да се дејствува на многу начини за да се зајакне нивната структура. На пример, имаме 81 општина во државата, а имаме само од 14 до 16 даночни инспектори. Тоа е недозволиво“, категоричен е Треновски.
Целиот разговор со него погледнете го на видеото во рамките на објавата.
.webp){kind=icon}
