„Да скапеме во затвор“ е новото „жими мајка“. Вицепремиерот Груби очи в очи со бизнис-заедницата гарантира дека нема да има малверзации при изградбата на коридорите 8 и 10Д, а „ако се проневери еден денар, да скапеме во доживотен затвор“. Тој уште еднаш потврди дека сè е чисто во договорот со „Бехтел и Енка“ и дека сè што се пишува и зборува е само политичка хајка.
Додека се држи тензијата со автопатиштата, како да ги заборавивме функционерските плати зголемени за 78 отсто. И Светската банка е зачудена од одлуката и бара таа да биде коригирана.
Оние, пак, што треба да работат за многу помали плати, си одат од државата. Идејата за носење странски работници на нивно место сè уште се одржува во живот во медиумите, па ние проверивме колку странци дошле да работат овде од почетокот на годината. Вкупно 1.615 дозволи издала Агенцијата за вработување, над 300 од нив се за директори. Дури и на тие што животот ги донел овде како бегалци, земјава тешко им дава дозвола за работа и не го користи нивниот потенцијал.
Сигурни се само тие 130.000 што работат на „државно“. А подобри времиња на пазарот на трудот носи и инвестицијата на „Јагео“ од Тајван, најавени се две фабрики и 4.000 работни места. Овој инвеститор ја одбра Македонија во битка со повеќе земји во регионот.
Годинава му тргна на ГТЦ. За три месеци оствари добивка од 130.000 евра за разлика од ланските 15.000 евра. Сепак, рекордер со раст на добивката од 98,9 отсто во првиот квартал е Комерцијална банка. „Реплек“, пак, најави среднорочен план по кој ќе се раководи кога станува збор за дивидендата. Со тоа и сегашните акционери, но и идните инвеститори имаат јасна предвидливост за можностите што ги нудат нивните акции.
Душан Пецовски/„Реплек АД“
За поранешната зграда на Комерцијална банката, пак, која државата во 2012 година ја купи за речиси 22 милиона евра, сега Владата ќе плати уште 6,5 милиони за да ја реновира. Трошокот се прави во период кога и во земјава и во регионот поради битката со инфлацијата се намалува економската активност, што, пак, ги зголемува минусите во буџетите.
А инфлацијата ќе се одрази и на квалитетот на летниот одмор. Цените на аранжманите растат во услови кога туристите не сакаат да се расфрлаат со пари.
Излезе и новиот број на „Блумберг Адрија бизнисвик“. Во него можете да ја прочитате сторијата за Словенецот Чук, кој на плантажата што ја купил од менаџерката на Тоше Проески, Љиљана Петровиќ, произведува сливова ракија. Ние во Македонија претпочитаме лозова и проверивме колку пиеме сами, а колку продаваме во странство.
.webp){kind=icon}
