.webp){kind=icon}
Бројот на вработени во јавниот сектор заклучно со 31 декември 2022 година изнесувал 129.374 лица, распоредени во вкупно 1.354 институции, соопшти денеска министерот за информатичко општество и администрација Азир Алиу, при презентацијата на годишниот извештај за вработените во јавниот сектор.
Иако бројот на институции во однос на 2021 година е зголемен за осум, Алиу нагласи дека бројот на вработени во 2022 година е намален за 2.714 во однос на претходната година.
Во јавниот сектор повеќе се вработени жени, и тоа 56,29 отсто, наспроти мажите, кои се застапени со 43,71 отсто. Просечната возраст на вработените изнесува 46,03 години и, во однос на претходниот извештај за 2021 година, се забележува незначително намалување на просечната возраст на вработените.
Од вкупниот број, 18.909 лица биле вработени во армијата, Министерството за внатрешни работи, Агенцијата за национална безбедност, Агенцијата за разузнавање и во Управата за финансиска полиција. Освен како бројка, за овие вработени лица во извештајот не се прикажуваат други детални анализи, а тоа е поради законски и безбедносни причини.
Bloomberg
Детална обработка и презентација на податоците се врши за преостанатите 110.465 вработени лица.
Најголем процент на вработени во јавниот сектор се во дејноста образование, и тоа 34 отсто, потоа во дејноста здравство 18 отсто, управа 13 отсто, комунални работи 9 отсто, труд и социјала 7 отсто, локална власт 5 отсто, транспорт и култура по 3 отсто итн.
Како што посочи министерот Алиу, во органите на државна власт, во согласност со овој извештај, се вработени вкупно 14.531 лице, што претставува 13 отсто од вкупната бројка на вработени во јавниот сектор. Споредбено со податоците во извештајот за 2021 година, бројот на вработени во државната власт е намален за 771 лице. Само од министерствата во претходната година бројот на вработени е намален за 302 лица.
Во однос на етничката припадност, на 31 декември 2022 година состојбата кај оние 110.465 вработени што се анализираат од повеќе аспекти била следна: 78.833 односно 71,36 отсто се Македонци, 23.855 односно 21,60 отсто се Албанци, 2.675 односно 2,42 отсто се Турци, 1.651 односно 1,49 отсто се Роми, 1.542 односно 1,40 отсто се Срби, 813 односно 0,74 отсто се други или не се изјасниле, 569 односно 0,52 отсто се Бошњаци и 527 односно 0,48 отсто се Власи.
Министерот Алиу исто така соопшти дека во 2022 година е намален бројот на доктори на науки и на магистри, а на сметка на тоа е зголемен бројот на вработени со основно образование.
Повеќе од половината, односно 55,85 отсто од вработените лица во јавниот сектор имаат најмалку високо образование.
