.webp){kind=icon}
Власта е убедена дека нема да дојде до генерален штрајк во Управата за јавни приходи и Царинската управа. Според министерот за финансии, Фатмир Бесими, досега нема официјална најава за гштрајкови во двете институции и тој смета дека ниту УЈП, ниту царинските службеници немаат намера да затворат гранични премини или да не исплатат плати. Верува дека ситуацијата ќе се надмине.
„Нема ништо официјално во документи како најави што беа пренесени. Има закон за регулирање на правата како се дефинира процедурата за штрајк. Во однос на исплата на плата и во однос на гранични премини, тоа не може да се случи. Мислам дека тука не е ниту намерата на УЈП, на вработените, ниту на царинските службеници да затворат гранични премини или да не исплатат плати. Нема официјално за тоа. Има закон за штрајк како се регулира. Во Законот точно се регулира дека синдикатите заедно со работодавачите утврдуваат начин како тоа ќе излезе. И тука мора да сме стриктни сите, во однос на почитување на законите, и во однос на почитувањето на правата“, вели Бесими.
Во однос на тоа дали ќе бидат зголемени платите во овие две институции, министерот уште еднаш го повтори владиниот став, дека земјава треба да има ефикасна, професионална јавна администрација и поради тоа, се бара одржливо системско решение кое ќе важи за сите.
„Со синдикатите разговараме да има еден предлог, разговараме за следните чекори - да биде системско решение, да важи за сите, да има постојана динамика на плати што го следи приватниот сектор, односно продуктивноста на економијата, а и тоа што се случува во однос на цените, инфлацијата со цел да имаме еден стандард и одржливо решение кое ќе важи за сите. Имаме комуникација и со УЈП и Царинската управа, но тоа се две различни работи. Таму имаме процес каде што има многу закони во однос УЈП и во однос на методологијата што се води со синдикатите. Методологијата е една што ќе важи за сите. Во однос на овие две институции, таму се регулираат и други прашања кои се во областа на законите, УЈП, Царинската управа. На нас, како ресорно Министерство, ни е важно институциите да функционираат, вработените да бидат професионални. Имаме разбирање за нивните барања, но исто тоа што го гледаме, го следиме од аспект на прашања што значат одржливи решенија. Мислам дека тоа ќе се надмине“, потенцира Бесими.
И вицепремиерот задолжен за економски прашања вели дека проблемот ќе биде решен преку системско решение
„Тврдиме дека тој модел ќе осигура достоинствени плати за вработените во јавниот сектор“, изјави Битиќи.
Во однос на штарјкот во УЈП кој е закажан за 27 јуни вицепремиерот вели дека веќе е назначен помирувач со Синдикатот во УЈП и се бара решение.
„ Ако помирувачот рече дека не е исполнет законскиот услов и дека треба да добијат повисоки плати, како Влада ќе мораме тоа да го направиме. Постои и механизмот на автентично толкување на законот во Собрание. Ако Собранието ни потврди дека УЈП и Царинската управа треба да добијат покачување на плати според тој закон, како што добиле другите вработени во Министерството за финансии и другите органи под Министерството за финансии кои тоа го добиле, нема никаков проблем да изгласаме таква одлука на Влада и да добијат повисоки плати“, рече Битиќи
Платите во јавниот сектор подолго време се камен на сопнувањето меѓу власта и синдикатите. Социо – економскиот совет со месеци преговара за новата методологија по која ќе се пресметуваат платите. Синдикатите предложија основа за пресметка на платата на биде просечната плата која потоа би се множела со коефициентите. За власта ваквиот модел првично беше прифатлив од 2028 година, на што синдикатот се спротистави. Сега рокот е скратен на две и пол години и за него ќе треба да се произнесе синдикатот.
