.webp){kind=icon}
Каматата на благајничкитe записи е на нивото од пред 13 години, по последната одлука на НБРМ изнесува шест отсто. Потегот на централната банка е само продолжение на потезите на Европската централна банка од минатата недела. Неделава и Банката на Англија остана на истата линија и ја зголеми каматата на пет отсто, или најмногу во последните 15 години. Оваа камата е блиску до нивото што може да ја турне земјата во мала рецесија.
Добро утро, ова се петте вести што сметаме дека се важни за почеток на денот.
Бесими: Има закон за штрајк, не може да нема плати и да се затворат граници
Не може да се случи да не се исплаќаат плати поради штрајк во Управата за јавни приходи или да бидат затворени граничните премини поради штрајк во Царинската управа, вели министерот за финансии Фатмир Бесими. Според него, преговорите продолжуваат и состојбата ќе биде надмината.
„Нема ништо официјално во документи како најави што беа пренесени. Има закон за регулирање на правата како се дефинира процедурата за штрајк. Во однос на исплата на плата и во однос на гранични премини, тоа не може да се случи. Мислам дека тука не е ниту намерата на УЈП, на вработените, ниту на царинските службеници да затворат гранични премини или да не исплатат плати“, вели Бесими.
Дали растот на каматите е задоцнет?
Комерцијалните банки „пливаат“ во ликвидност и затоа мерките на ФЕД, ЕЦБ и македонската Народна банка имаат послаб ефект, вели во интервју за „Блумберг Адрија“ универзитетскиот професор Синиша Наумоски, кој смета дека растот на каматните стапки е задоцнет.
„Погледнете ги комерцијалните банки, само во минатата година покажуваат профитабилност од 160 милиони евра, раст за околу шест отсто од 2021-та. Ако ја погледнеме 2023 година, исто така ќе добиеме повисок податок во контекст и како раст на кредитирањето и раст на депозитната база. Сето тоа говори дека проблемот треба да се погледне од страна, колку ЕЦБ и ФЕД имаат директно влијание или можеби треба да се постави прашањето дали сето ова е задоцнето покачување. Тоа требаше да се направи брзо уште во 2022-та, некаде во летниот период“, вели Наумоски.
Криптопазар: Водич за инвестиции во Македонија
По ланските турбуленции на пазарот, предизвикани најмногу од пропаѓањето на неколку криптоберзи, развиените земји се насочија кон сериозна регулација на криптопазарот, што несомнено резултира со враќање на довербата на инвеститорите, особено институционалните, во овие средства.
Кај нас криптопазарот не е официјално регулиран, односно работата на криптоменувачниците е само делумно регулирана преку Законот за спречување на перењето пари и на финансирањето тероризам. Овој закон донекаде ги регулира поседувањето и користењето криптовалути под референцата „виртуелни средства“. Според тоа, работата на криптоменувачниците кај нас е легална, но недостигаат јасни правила на игра.
Како до „зазеленување“ на бизнисите?
Бизнисите во земјава имаат потреба од државна поддршка за да се насочат кон зелени проекти. Таа поддршка би требало да биде даночно олеснување за компаниите што навистина се трудат да направат нешто по ова прашање. Од друга страна, голем поттик за компаниите би било ако држава помогне со различни грантови шеми за спроведувањето зелени активности во компаниите.
„Зелената агенда ќе биде нешто што ќе мора да го прифатат сите компании и да преземат активности, во иднина сигурно ќе имаме и притисоци од ЕУ за бизнисите да бидат дел од промените“, вели Олга Рајчиќ од компанијата „Грин ај-ти“ (GreenIT), чија апликација „Челинџер“ (Challenger) е дел од кампањата #WeArePlay на „Гугл плеј“ за иновации што имаат корисно влијание врз околината.
Маск го предизвика Закерберг на борба во ринг
Кој би победил во борба во кафез меѓу Илон Маск и Марк Закерберг во Лас Вегас? Ако им се верува на објавите на социјалните мрежи на технолошките шефови и милијардери, наскоро би можеле да дознаеме.
Маск, кој го купи „Твитер“ во октомври, ја поттикна идејата како одговор на плановите на „Мета“ да воведе конкурентна услуга.
Основачот на „Фејсбук“, Закерберг, десеттиот најбогат човек на светот според податоците собрани од „Блумберг“, потоа објави на Инстаграм скриншот од коментарите на Маск со натпис: „Испрати ми локација“.
