.webp){kind=icon}
Статистички, просечната плата се доближи до 600 евра. Исто така, статистички, тоа значи дека некој јаде месо, друг јаде зелка, а заедно сите јадеме сарма.
Кој јаде месо? Вкупно 1.060 државни функционери на кои во април на сметките им легнаа по 78 отсто повисоки плати и го дигнаа државниот просек, затоа што, поединечно, зголемувањето изнесуваше и по 900 евра.
Кој јаде зелка? Работниците, па дури и тие што земаат, исто како функционерите, плата од буџетот. За нив нема покачување. Вработените во УЈП законските 30 отсто ќе си ги бараат со штрајк, па нема да има плата за цела држава. Значи, каков ќе биде јунскиот просек ќе зависи од преговорите што се во тек.
За тие што јадат зелка, платите не растат, ама затоа растат каматите за кредитите. И допрва ќе растат, откако НБРМ во средата уште еднаш ја зголеми каматната стапка на шест отсто, или најмногу во последните 13 години. Се зголемуваат и ограничувањата за задолжување. Од 1 јули за секој граѓанин ќе има праг за задолжување односно нема да може да земе кредит ако ратите му надминуваат 55 отсто од доходот ако станува збор за кредит во денари или 50 отсто при одобрување кредит во девизи или со девизна клаузула. И во вакви услови на раст на каматите и статистички раст на просечната плата, должниците се дисциплинирани и редовно си ги плаќаат обврските.
Последица од ваквиот живот е нискиот животен стандард на Македонците. Фактичката индивидуална потрошувачка по жител лани во Македонија била за 49 проценти пониска од просекот во ЕУ, а БДП по жител бил за 58 проценти под европскиот просек. Нашата земја е трета на дното на табелата според овие показатели, а зад нас се само БиХ и Албанија.
Придонес кон тенкиот буџет на просечниот Македонец нема да даде ни евтината струја прекуден. Регулаторна комисија од технички причини двата часа поевтина струја ги најави за од Нова година наместо од следниот месец. А дотогаш којзнае што уште може да се случи. Експертите велат дека сегашните ниски цени ќе се зголемат кон крајот на годината.
Анализиравме и како од година на година се намалува бројот на инвеститори, и домашни и странски, на македонскиот пазар на капитал. Се занимававме и со пазарот на недвижности. Светскиот тренд на ладење нема да нè зафати, велат инвеститорите од секторот, пред сè затоа што веќе нема добри локации за градење.
Нашиот аналитички тим врз основа на податоците од стратот на оваа година смета дека има оптимизам за регионот и сегашните прогнози се подобри од претходните.
Нашиот ТВ-тим се занимаваше со потенцијалот на туризмот на почетокот на сезоната. Министерот за транспорт Бочварски вети дека до 10 јули влезот на Охрид ќе биде завршен и функционален, а туристичките работници велат дека ако се исполни тоа, следниот месец Охрид ќе биде полн со гости.
Неделава се занимававме и со тоа со што се занимава цел свет – вештачката интелигенција. За жал, анализата покажа дека ние немаме податоци за да имаме вештачка интелигенција.
