.webp){kind=icon}
Вода - ограничен природен ресурс без кој не се може. Глобалната побарувачка за вода се очекува да се зголеми за 55 отсто до 2050 година, главно поради растечките барања од производството, но и поради климатските промени и начинот на кој луѓето ја користат водата. Денес земјоделството е убедливо најголем потрошувач на вода во светот, а по него следува индустриското производство. Имено, од вкупната употреба, 72 отсто отпаѓа на земјоделството, додека 12 отсто на индустријата.
Во земјава, според националниот план за климатски промени, се очекува 18 отсто од водните ресурси да се намалат до 2100 година. За инвеститорите, нема простор за страв ако навремено се преземат мерки за зачувување на овој значаен ресурс.
„Со оглед на застапеноста на природните ресурси во Македонија, инвеститорите засега не стравуваат од недостиг од вода. Но, на долг рок постои ризик достапноста на овој ресурс да се ограничи, само поради една причина - нерационалното и неправилно управување со водата од страна на компаниите и луѓето. Земјава има огромен број реки и потоци, но нема стратегија како да се задржи и искористи таа вода, градејќи брани или инвестиции од страна на компаниите за пречистување на водата и повторно користење“, велат од Сојузот на стопански комори.
Bloomberg Mercury
Дури 98 отсто од вкупно искористената вода во индустријата е во секторот снабдување со електрична енергија, гас, пареа и климатизација, а преостанатите два отсто се за потребите на преработувачкиот сектор и рударството. Во 2022 година, на индустријата за непречено производство ѝ биле потребни 2,177 милиони кубни метри, што е речиси двојно повеќе од искористената вода во 2017 година.
Македонија е чекор назад во користењето вода што поминува низ филтри за пречистување за да може повторно да се употреби во производството во кој било сектор. Од вкупно искористената вода, само 15,5 отсто е пречистена. Индустријата најмногу користи свежа техничка вода и свежа вода за пиење.
Речиси не постои производ што го консумираат или го употребуваат луѓето, а да не е произведен со користење на водата како ресурс. Во процесот на производство се користат илјадници литри вода за да се произведат храна, облека, градежни материјали, технологија и сл.
Европа
Целокупната употреба на водните ресурси на долг рок може да се смета за одржлива во поголемиот дел од Европа. Сепак, одредени региони може да се соочат со проблеми поврзани со недостигот од вода. На европско ниво, домаќинствата и индустријата се важни корисници на вода. Холандија и Белгија доминираат во употребата на водата за потребите на индустријата за разлика од домаќинствата, додека земјите во кои е позастапен услужниот сектор, како Грција, Кипар, Латвија и Малта, употребата на вода во домаќинствата е и до осум пати поголема отколку во индустријата.
Свет
Водата станува сè помалку достапна поради климатските промени, додека демографијата и економскиот раст ја зголемуваат побарувачката. Се предвидува дека до 2030 година ќе има јаз од 40 проценти помеѓу понудата и побарувачката за свежа вода. Годинава се одржа првата конференција на Обединетите нации за водата по речиси 50 години. На конференцијата инвеститорите и ЦДП (CDP), непрофитната организација што го води глобалниот систем за податоци за животната средина, потпишаа отворено писмо во кое бараат од владите да преземат повеќе активности за зачувување на водата и да им се посветат на инвестициите од страна на компаниите што се од витално значење за постигнување безбедност на водата. Проблемите со водата на компаниите може да им предизвикаат потенцијален трошок од 392 милијарди долари, а доколку се преземат рани активности за заштита на овој ресурс, ќе се потрошат 436 милијарди долари, покажуваат податоците собрани од ЦДП. Раните мерки што би се презеле сега би спречиле поголемиот дел од светот да остане без вода.
