Раст на вкупните депозити и кредити во август

Во август, вкупните депозити остварија месечно зголемување од 0,2 проценти, што во целост се објаснува со растот на депозитите на корпоративниот сектор, при пад на депозитите на домаќинствата, соопшти Народната банка. Годишниот раст изнесува 10,1 проценти, како резултат на зголемувањето на депозитите на двата сектора, со малку поизразен придонес на корпоративниот сектор.

Вкупните кредити, во август, се повисоки за 0,3 проценти споредено на месечно ниво во целост поради зголеменото кредитирање на секторот „домаќинства“.

„Годишниот раст од 6,4 проценти е резултат на растот на кредитирањето кај двата сектора, со поголем придонес на секторот „домаќинства““, информираат од Народната банка.

Овој месец, кај вкупните депозити на корпоративниот сектор е забележан месечен раст од 3,1 проценти, главно под влијание на зголемените краткорочни депозити во странска валута и депозитните пари, а во помала мера и на долгорочните депозити во денари, во услови на пад на краткорочните депозити во денари и долгорочните депозити во странска валута. 

„Во споредба со август претходната година, депозитите на корпоративниот сектор се повисоки за 19 проценти, како резултат на растот на сите компоненти, со најголем придонес на краткорочните депозити во странска валута и депозитните пари.“, велат од Народната банка.

Оттаму додаваат дека кредитите на корпоративниот сектор во август се намалени за 0,3 проценти на месечна основа, во целост под влијание на падот на кредитите во странска валута, при забележан раст на кредитирањето во денари.

„Годишниот раст изнесува 5,8 проценти и произлегува од зголемените кредити во денари и во странска валута, со поголем придонес кон растот на кредитите во денари“, информираат од централната банка.

Во август, депозитите на домаќинствата се намалени за еден процент во однос на претходниот месец, во целост како одраз на падот на депозитните пари, во услови на остварен раст кај останатите компоненти.

„Во споредба со август минатата година депозитите на домаќинствата бележат раст од 7 проценти, како резултат на повисоките долгорочни депозити во странска валута и во денари и депозитните пари, а во услови на забележан пад на краткорочните депозити во странска валута.“, велат од Народната банка.

Кај кредитите на домаќинствата, во август, месечната стапка на раст изнесува 0,7 проценти, во поголем дел поради зголеменото кредитирање во денари, при позитивен придонес и на кредитите во странска валута.

„Анализирано на годишно ниво, кредитите на домаќинствата остварија раст од 6,7 проценти, при раст на кредитите во денари и во странска валута, со поголем придонес на кредитите во странска валута“, информираат од Народната банка.

Во август, анализирано според намената на кредитите одобрени на физичките лица, потрошувачките и станбените кредити, како најзастапени категории, бележат месечно зголемување од 0,3 и 0,5 проценти, соодветно, како и годишен раст од 6,4 и 10,8 проценти, соодветно. Автомобилските кредити, овој месец, забележаа раст од 1,3 проценти на месечна основа, како и годишен раст од 16,7 проценти, додека кредитите одобрени на кредитни картички се зголемија за 0,3 проценти на месечна основа, при годишен пад од 2,1 проценти.

„Во август, негативните салда на тековните сметки забележаа месечен и годишен раст од 13 и 7 проценти, соодветно, додека кредитите одобрени врз други основи се намалија на месечно и на годишно ниво за 0,3 и 16,9 проценти, соодветно.“, велат од Народната банка. 

Во моментов нема коментари за веста. Биди прв да коментира...

Остави коментар