.webp){kind=icon}
Стапката на инфлација во Македонија во октомври годинава изнесувала 3,5 проценти. Според податоците на Државниот завод за статистика, цените на мало во октомври се зголемиле за 3,4 проценти споредено со истиот месец лани.
Кога станува збор за храната, споредено со претходниот месец, намалување на цените се забележува кај млекото за 10,1 отсто, јајцата за 9 отсто, свежиот и разладениот зеленчук, освен компирите и другите коренести плодови, за 8,6 отсто, минералната вода, газираните пијалаци, соковите од овошје и зеленчук за 6,4 отсто, свежото и разладеното овошје за 5,2 отсто, пивото за 4,3 отсто, сирењето и урдата за 4,1 отсто, месото за 3,4 отсто, лебот и житата за 3,3 отсто и маслото и маснотиите за 0,9 отсто.
Државниот завод за статистика бележи зголемување на цените кај шеќерот, џемот, медот, чоколадата и кондиторските производи за 2,4 отсто, прехранбените производи неспоменати на друго место за 1,8 отсто, жестоките пијалаци за 1,4 отсто, рибата и морските плодови за 1,2 отсто, виното за 1 отсто, кафето, чајот и какаото за 0,4 отсто.
Покрај храната, статистика забележува намалување на индексите на трошоците на животот кај медиумите за снимање за 7,7 отсто, информатичката опрема за обработка на податоците за 7,3 отсто, горивата и мазивата за сопствени превозни средства за 3,2 отсто, велосипедите за 1,8 отсто, услугите за сместување за 1,1 отсто, цврстите горива за домаќинствата за 1 отсто и медицинските услуги за 0,2 отсто.
Во октомври пораст на индексите на трошоците на животот е забележан и кај електричните апарати за лична хигиена за 9,5 отсто, воздухопловниот патнички транспорт за 5,2 отсто, ветеринарните и другите услуги за домашните миленици за 4,7 отсто, гасот за домаќинствата за 3,9 отсто, градините, растенијата и цвеќињата за 2,6 отсто, фотографската и кинематографската опрема и оптичките инструменти за 1,5 отсто.
