Од 1 јануари вработувањата во јавниот сектори и државната администрација ќе се реализираат без потребниот потпис од Министерството за финансии, што беше практика досега. Раководителите на државните буџетски институции сами ќе одлучуваат за новите вработувања во согласност со годишниот финансиски план и прегледот за вработувања. Во случај да се надмине планираниот буџет, одговорноста ќе падне врз министерот, посочи на денешниот брифинг со новинарите министерот за финансии Фатмир Бесими.
МИА
„Преку новата поедноставена постапка, процесот на вработување во јавниот сектор ќе се врши врз основа на одобрен план за вработување во буџетскиот корисник или институцијата и врз основа на изгласаниот буџет во Собранието, дополнето со изјава од страна на раководното лице на институцијата за обезбедени средства за вработувањето за која презема одговорност“, вели Бесими.
Раководителот на институцијата ќе треба да достави изјава до Агенцијата за вработување или до Агенцијата за државни службеници во која под полна материјална и кривична одговорност ќе потврди дека во буџетот на институцијата се обезбедени средства за новото вработување.
„Станува збор за сериозна реформа во постапката за вработување, со која ќе се децентрализира процесот и ќе се подобри управувањето со човечкиот капитал. Постапката има контролни механизми, односно нема да може да се објави оглас без да е одобрено тоа во планот за вработување“, вели Бесими.
За ова да стапи во сила, прво ќе треба да бидат донесени законот за буџет и законот за извршување на буџетот. Евентуалните злоупотреби ќе можат да ги пријават и самите вработени, а за погрешна изјава раководителот ќе биде гонет од Јавното обвинителство и од судовите.
.webp){kind=icon}
