Економското недостоинство и немањето соодветен македонски интегритет се меѓу клучните причини поради кои младите си заминуваат од земјава. Во последните години, покрај младите, и повозрасните граѓани одлучуваат да ја напуштат земјава, барајќи подобри услови за живот, што е поразувачко. Ова се некои од заклучоците на Форумот за заштита на македонскиот идентитет, во организација на Универзитетот Скопје.
„Македонија не е сиромашна земја, македонскиот народ е сиромашен, ќе кажам сè почесто зборуваме не за сиромаштија туку за беда. Можеби поважно од сиромаштијата е да измериме колку сме нееднакви, а, за жал, во Македонија е огромен распонот и нееднаквоста е огромна, што значи дека само кај четири или пет проценти е сконцентрирано речиси целото богатство. Заминуваат многу од младите, бидејќи тие таму ги бараат одговорите што ќе добијат по студиите“, вели универзитетската професорка Благица Новковска.
МИА
Висината на платите е веќе на четврто место како причина за заминување на младите. Лошото образование, здравството и она што државата треба да го овозможи за нормален раст и развој на семејството се сега главните фактори за заминување. Говорниците на форумот заклучија дека нашата економија го губи здивот, едноставно ја нема веќе таа сила, и дека сме последни од земјите на Западен Балкан.
„За жал, мислам дека недостига институционална поддршка. Ние разговараме како ќе ја контролираме инфлацијата, како да ја контролираме ако знаеме дека цената на житото е берзански производ и не зависи од нас. Да не излезе на крајот дека двигател на економијата е самата држава, со зголемувањето на минималната плата, со зголемувањето на сите други плати вие континуирано произведувате инфлација. Мораме да ја оставиме економијата сама да работи, да имаме здрави економски основи“, рече претседателот на Сојузот на стопански комори, Трајан Ангелоски.
Говорниците на форумот посочија дека вложувањето во човечки капитал, едукација и поддршка на македонските компании се дел од насоките за државата да бележи повисок економски раст.
.webp){kind=icon}