Народната банка ги објави податоците за „зелените кредити“ за четвртиот квартал од 2023 година, каде што се забележува раст на квартално ниво од пет проценти односно годишен раст од 29,1 проценти. Во споредба со крајот на 2019 година, кога почнале да се прибираат податоците, „зелените кредити“ се зголемени за 2,8 пати. Станува збор за заеми наменети за проекти коишто поддржуваат одржливи, еколошки цели, или цели коишто придонесуваат за зелената транзиција во општеството, како што е развивање нова еколошка технологија.
Според податоците на Народната банка, на крајот од 2023 година, банкарските побарувања врз основа на зелени кредити изнесуваат 19,8 милијарди денари (322 милиони евра). За споредба, на крајот на 2019 година тие изнесувале 7,1 милијарди денари (116 милиони евра).
„Растот на ‚зеленото кредитирање‘ се должи најмногу на кредитите земени од фирмите, додека најмногу ‚зелени кредити‘ давале големите банки“, посочуваат од Народната банка.
Оттаму додаваат дека расте и уделот на зелените во вкупните кредити, иако сѐ уште е на ниско ниво. Oд крајот на 2019 година, заклучно со 2023 година, учеството на зелените во вкупните кредити е зголемено од 2,2 проценти на 4,5 проценти.
Од Народната банка наведуваат дека препознавајќи ги ризиците од климатските промени на долг рок, зазеле проактивен став и како една од своите стратегиски цели ја поставиле зголемената свесност за климатските промени и придонесот кон зелената одржлива економија.
„Преку низа активности, нашата централна банка придонесува за поттикнување на зеленото финансирање, вклучувајќи ги и монетарните мерки“, велат од НБМ.
Инаку, Народната банка изработи среднорочен план на активностите во доменот на управување со ризиците поврзани со климатските промени за периодот 2023 − 2025 година, а неодамна заради подобрување на расположливоста на податоците за климатските промени објави и преглед на зелените показатели коишто ќе помогнат во анализите за понатамошно носење политики.
„Се гради и зелено портфолио на хартиите од вредност во девизните резерви. За оцена на отпорноста на банкарскиот систем на климатските промени се планираат стрес-тестови“, посочуваат од Народната банка.
.webp){kind=icon}
Во моментов нема коментари за веста. Биди прв да коментира...