Во услови на тешки времиња за домашната економија, неизвесност за бизнисот, зголемени трошоци и поскапувања на кредитите, во Македонија и дел од акционерските друштва кои се во државна сопственост имаат мачни проблеми. А ова не е новитет за АД Водостопанство на Македонија во државна сопственост чии неколку стотици вработени веќе трет месец немаат плата, ниту за нив се уплатени придонеси за пензиско и за здравствено осигурување. Дел од вработените за Bloomberg Adria сведочат дека во слична ситуација со осцилации се наоѓаат со години. Доцнења на платата имаше и минатата година, а имаат малку опции на располагање. Во моментов во АД Водостопанство на Македонија има над 600 вработени.
Bloomberg Adria се обрати во Владата под чија надлежност е ова претпријатие и каде таа е единствен акционер со барање да ни се одговори што ќе преземе за решавање на ситуацијата и краткорочно, ама и на долг рок. На повеќето прашања следуваше овој одговор.
„Владата е запознаена со финансиската состојба на АД Водостопанство на Северна Македонија и ќе помогне да се надминат предизвиците со кои тоа се соочува.
Во најскоро време ќе се одржи состанок на ресорните министри со раководството на акционерското друштво во државна сопственост на кој ќе се утврди висината на финансиската помош за одржување на ликвидноста и нормалното функционирање на основната дејност на Друштвото. Исто така ќе биде разгледан и соодветен план за реструктурирање на АД Водостопанство, велат од Владата.
А финансиска помош за друштвото од државниот буџет имаше и претходно како и некои најави за реструктуирање, но од обидите ништо не беше долгорочно решение на проблемот.
Во декември 2020 година кога носеше дополнителен пакет за помош на стопанството за справување со последиците од Ковид-19, Владата обезбеди финансиска поддршка од околу 36 милиони денари (600.000 евра) за исплата на две плати на вработените во АД Водостопанство.
Следната година во август, помош повторно беше потребна па така Владата подготви пакет помош од 200 милиони кои требаше да се префрлат до крајот на годината. Претходно пак уште во 2019 претпријатието добило бескаматна позајмица од 1,5 милиони евра од Министерството за финансии. Дали е вратен долгот, нема информации.
Меѓутоа за проблеми во АД Водостопанство се зборуваше уште во 2018 година, а тоа се само три години од неговото основање. Како беше формирано, така според вработените, стана база за вработување на партиски кадри, а веднаш беше неодржливо.
Формирано како претпријатие за стопанисување со системите за наводнување и одводнување и Владата како единствен акционер, ова друштво има свој Одбор на директори. Согласно член 30 од статутот Главниот Извршен директор најмалку еднаш во три месеци му поднесува на одборот на директорите пишан извештај за работењето на друштвото во кој ќе бидат содржани финансиски показатели за работењето на друштвото. Одборот на директори ги одобрува и доставува до Собранието тримесечните финансиски извештаи.
На интернет страницата на друштвото последните податоци се за реализацијата на буџетот во третиот квартал минатата година. Вкупните приходи за тој период се 112,5 милиони денари, а трошоците 152 милиони денари што значи дека за овој период е остварена загуба во износ од околу 40 милиони денари.
Во тој период пораснале трошоците за плати на вработените за три милиони денари, односо во третиот квартал изнесуваат речиси 58 милиони денари.
Последните податоци за долговите кои се ставени на интернет страницата се заклучно со јуни лани кога обврските на ова државно претпијатие изнесуваат 303 милиони денари од кои 51 милион денари се недоспеани обврски, а остатокот од 252 милиони денари се доспеани. Тогаш најголем бил долгот кон ЕВН, за други обврски но и за ДДВ и за плати.
Актуелен директор е Локман Љимани.
.webp){kind=icon}
