За три години откриени над 31.000 фалсификувани евро монети во Македонија

Како и во претходните години, и во текот на 2024 година има појава на релативно големи количини  фалсификувани монети на евра, информира Народната банка во годишниот извештај. Лани биле откриени вкупно 6.181 парчe фалсификувани монети на евра, од кои 4.738 парчиња во апоен од две евра и 1.443 парчиња во апоен од евро евро. Од останатите валути, забележани се вкупно 21 фалсификувана монета.

„Блумберг Адрија“ веќе пишуваше дека во 2022 година во земјава биле откриени вкупно 13.983 парчиња фалсификувани монети на евра, и тоа 13.583 парчиња во апоен од две евра, 321 парче во апоен од едно евро и 79 парчиња во апоен од 50 центи. Во 2023 година биле откриени вкупно 11.489 парчиња фалсификувани монети на евра, од кои 11.122 парчиња во апоен од две евра и 367 парчиња во апоен од едно евро. Математиката покажува дека во периодот 2022-2023 година се откриени вкупно 31.653 фалсификувани монети на евра.

Еврата најзастапени и меѓу откриените фалсификати на книжни пари

Инаку, во годишниот извештај од Народната банка информираат дека во однос на извршените експертизи на доставените сомнителни книжни пари деноминирани во странски валути во 2024 година, од вкупно 549 направени анализи се утврдени 291 фалсификуванa парa и 258 оригинални пари. Во вкупниот број фалсификувани книжни пари, најзастапени се книжните пари во евра (214 парчиња) и американски долари (70 парчиња).

Depositphotos

„Општата оцена е дека фалсификуваните книжни пари имаат релативно лош квалитет на изработка, што овозможува едноставно и лесно откривање и утврдување на нивните карактеристики“, наведуваат од Народната банка.

Оттаму објаснуваат дека при експертизата на техниката на изработка на фалсификуваните книжни пари, утврдено е дека тие се изработени главно на обична хартија, без доволно заштитни елементи, со користење компјутерска техника (скенирање и печатење) или, пак, со користење фотокопир во боја.

Стоденарката омилена меѓу фалсификаторите

При експертизите на доставените сомнителни книжни пари деноминирани во денари, коишто се извршени во текот на 2024 година, се утврдени 501 фалсификуван примерок (наспроти 32 утврдени фалсификувани книжни пари во текот на 2023 година). Во вкупниот број откриени фалсификувани книжни пари во 2024 година, најзастапен е апоенот од 100 денари ‒ 464 парчиња, или 92,6 проценти од вкупниот број фалсификати, потоа следат апоенот од 500 денари ‒ 15 парчиња, или 3 проценти од вкупниот број фалсификати и апоенот од 2.000 денари ‒ 12 парчиња, или 2,4 проценти од вкупниот број фалсификати. Од НБМ нагласуваат дека во вкупниот број утврдени фалсификувани книжни пари не влегуваат фалсификатите коишто се запленети пред да бидат пуштени во оптек.

МИА

„Најголемиот дел од фалсификуваните примероци на банкноти му припаѓаат на еден ист тип фалсификат со апоенска вредност од 100 денари. Овој тип фалсификат може лесно да се препознае преку едноставна проверка на заштитните елементи коишто задолжително ги поседуваат автентичните банкноти со истата апоенска вредност“, посочуваат од Народната банка. 

Вкупната вредност на фалсификуваните денари изнесува 83.900 денари и има незначително учество во однос на вкупната вредност на парите во оптек.

„Општо земено, појавата на фалсификување на нашата парична единица е многу ниска, а ризикот за граѓаните и за пошироката јавност да дојдат во контакт со фалсификувана пара е минимален“, наведуваат од централната банка.

Во моментов нема коментари за веста. Биди прв да коментира...

Остави коментар