Како и во 2022 година, и во текот на 2023 година продолжува појавата на големи количини на фалсификувани монети на евра во Македонија, информира Народната банка во годишниот извештај за минатата година. Имено, лани биле откриени вкупно 11.489 парчиња фалсификувани монети на евра, од кои 11.122 парчиња во апоен од 2 евра и 367 парчиња во апоен од 1 евро. Од останатите валути, регистрирани се вкупно 11 фалсификувани монети од одредени валути.
Во однос на извршените експертизи на доставените сомнителни книжни пари деноминирани во странски валути во 2023 година, од вкупно 1.042 направени анализи се утврдени 329 фалсификувани пари и 713 оригинални пари. Во вкупниот број фалсификувани книжни пари, најзастапени се книжните пари во евра (160 парчиња) и американски долари (150 парчиња).
„Општата оценка е дека фалсификуваните книжни пари имаат релативно лош квалитет на изработка, што овозможува едноставно и лесно откривање и утврдување на нивните карактеристики“, наведуваат од Народната банка.
Оттаму додаваат дека при експертизите на доставените сомнителни книжни пари деноминирани во денари, коишто се извршени во текот на 2023 година, се утврдени 32 фалсификувани примероци, што претставува намалување од 90 проценти во однос на утврдените фалсификувани книжни пари во текот на 2022 година.
Покрај наведените, во текот на 2023 година анализирани се и 2.852 фалсификувани книжни пари кои биле предмет на полициска заплена пред да бидат пуштени во оптек. Во вкупниот број откриени фалсификувани книжни пари во 2023 година, најзастапен е апоенот од 2.000 денари ‒ 17 парчиња, или 53,1 проценти од вкупниот број фалсификати, потоа следат апоенот од 500 денари ‒ 6 парчиња, или 18,8 проценти од вкупниот број фалсификати и апоенот од 100 денари ‒ 6 парчиња, или 18,8 проценти од вкупниот број фалсификати.
„Вкупната вредност на фалсификуваните денари во 2023 година изнесува 40.600 денари и има незначително учество во однос на вкупната вредност на парите во оптек“, укажуваат од Народната банка.
Во централната банка оценуваат дека генерално, појавата на фалсификување на нашата парична единица е многу ниска, а ризикот за граѓаните и пошироката јавност да дојдат во контакт со фалсификувана пара останува минимален.
.webp){kind=icon}
