Нафтата достигна 85 долари за барел, извесно ново поскапување на горивата во Македонија

Нафтата од типот Брент денеска достигнува 85 долари за барел, што е убедлив рекорд во изминативе четири години. Воените дејствија во Иран и на Блискиот Исток и прекинот на транспортот на нафта низ Ормускиот теснец предизвикаа вртоглав раст на цените на енергентите на светските пазарите во изминативе два дена. Инвеститорите стравуваат дека продолжените воени дејствија можат да го нарушат редовното снабдување со нафта, со оглед на тоа што една петина од светските потреби од нафта доаѓаат токму преку Ормускиот теснец.

Стравот се прелеа и во нашата земја. На некои бензиските пумпи можат да се забележат редици од граѓани кои освен во автомобилите, полнат нафта и во пластични канти. Освен што се плашат од раст на цените, дел од нашите граѓани стравуваат и од можен недостиг од нафта во малопродажбата.  

Сепак, од Министерството за енергетика, рударство и минерални суровини соопштија дека со посебно внимание ја следат состојбата со актуелната енергетска ситуација, особено во контекст на нафтените пазари и потенцијалните геополитички ризици. Оттаму велат дека државните нафтени резерви се стабилни и обезбедуваат сигурност на снабдувањето за граѓаните и стопанството.

„Во рамки на своите надлежности, Министерството ја информира јавноста дека Агенцијата за задолжителни нафтени резерви постојано ги следи и одржува државните резерви на нафта и нафтени деривати, обезбедувајќи сигурност на снабдувањето, стабилност на пазарот и подготвеност за навремена реакција во случај на какво било нарушување на увозот или снабдувањето“, наведоа од Министерството.

Како што веќе објавивме, поради растечката цена на нафтата на светските берзи од полноќ имаше промена на цената на горивата во земјава. Малопродажните цени на бензините Еуросупер  БС-95 и Еуросупер БС-98, се зголемија за 1,00 денар за литар и се продаваат по 74,50 односно 76,50 денари за литар, соодветно. Малопродажната цена на дизелот не беше сменета односно остана 71,00 денар за литар.

Доколку цената на нафтата продолжи да расте на светските берзи, може да се очекува деновиве повторно да има ново позначително зголемување на цените на нафтените деривати во Македонија.

Од Регулаторната комисија за енергетика вчера објаснија дека во 2022 година, по почетокот на војната во Украина, е воспоставен механизам со кој се прават секојдневно пресметки и се утврдува дали се создадени услови за донесување на одлука за утврдување на највисоките малопродажни цени за одделни нафтени деривати.

„РКЕ носи вонредни одлуки секој пат кога пресметките покажуваат дека во крајната малопродажна цена ќе има зголемување или намалување од најмалку 2,00 денари за литар за бензините, дизел горивата и за екстра лесно гориво. Додека за мазутот одлуки се носат секој пат кога пресметките покажуваат дека во крајната малопродажна цена ќе има зголемување или намалување од најмалку 1,00 денар за литар“, објаснуваат од РКЕ. 

Со ваквиот пристап се обезбедува сигурност, стабилност и предвидливост на пазарот со нафтените деривати, а се со единствена цел да се заштитат потрошувачите од големи ценовни осцилации, велат од Комисијата.