Претставниците на Федералните резерви (ФЕД) на состанок одржан претходно месецов заклучиле дека наскоро би било соодветно да се забави со темпото на зголемување на каматните стапки, сигнализирајќи дека централната банка се стреми кон намалување на покачувањето во декември.
„Значајно мнозинство од учесниците сметаа дека забавување на темпото на раст најверојатно би било соодветно наскоро“, се вели во записникот од нивниот состанок од 1. до 2. ноември објавен во средата во Вашингтон.
Во исто време, некои официјални лица заклучиле дека „крајното ниво на стапката на федералните средства што би било неопходно за да се постигнат целите на комитетот е нешто повисоко од претходно очекуваното“.
На претходниот состанок, официјалните претставници ја зголемија референтната стапка за 75 базични поени четврти пат по ред на 3,75 отсто до 4 отсто, продолжувајќи ја најагресивната кампања на заострување уште од 80-тите, во борбата против горливата инфлација.
Официјалните лица разговарале за ефектите од доцнењето во монетарната политика и ефектите врз економијата и инфлацијата, како и за тоа колку брзо кумулативното заострување ќе почне да влијае на трошењето и вработеноста. Голем број претставници на ФЕД посочиле дека побавното темпо на зголемување на каматите ќе им овозможи на централните банкари да го проценат напредокот кон нивните цели.
Bloomberg
„Неизвесните заостанувања поврзани со ефектите од мерките на монетарната политика врз економската активност и инфлацијата беа меѓу причините зошто ваквата оценка е важна“, се вели во записникот.
ФЕД во својата изјава за политиката порачува дека стапките ќе продолжат да растат на „доволно рестриктивно“ ниво, земајќи го предвид кумулативното заострување и доцнењето на мерките.
Претседателот Џером Пауел на прес-конференција по состанокот објасни дека стапките на крајот ќе бидат повисоки од очекувањата на официјалните лица кога ги презентираа прогнозите во септември, сигнализирајќи дека темпото на зголемувања ќе биде поумерено понатаму.
Оттогаш, неколку функционери го поддржаа преминот кон намалување на покачувањето на 50 базични поени, на состанокот следниот месец. Инвеститорите гледаат на работите на ист начин, обложувајќи се дека стапките ќе достигнат врв околу пет проценти до средината на 2023 година.
Пауел има шанса да влијае на тие очекувања со говорот закажан во Вашингтон на 30. ноември.
По состанокот во ноември, економските податоци покажаа умерен раст со одредени знаци на забавување на инфлацијата, во услови на сѐ уште силна побарувачка за работна сила. Работодавците минатиот месец отвориле 261.000 работни места, а стапката на невработеност благо се зголемила на 3,7 отсто, иако таа и понатаму е многу ниска, гледано на историска основа.
.webp){kind=icon}
