Светот се соочува со рецесија во 2023 година, а повисоки трошоци за задолжување, чија цел е справување со инфлацијата, предизвикуваат пад на голем број економии, сметаат аналитичарите од Центарот за економија и бизнис-истражувања.
Глобалната економија за првпат во 2022 година надмина 100 илјади милијарди долари, но ќе запре во 2023 година, бидејќи креаторите на политиката ја продолжуваат својата борба против зголемените цени, објави британската консултантска куќа во својот годишен извештај за светската економија.
„Веројатно светската економија следната година ќе се соочи со рецесија како резултат на растот на каматните стапки, кои се одговор на повисоката инфлација“, рече Кеј Даниел Нојфелд, директор и раководител на Одделот за прогнозирање во Центарот за економија и бизнис-истражувања.
„Битката против инфлацијата сè уште не е добиена. Очекуваме централните банкари да се држат до своето оружје и во 2023 година, и покрај економските трошоци. Трошоците за спуштање на инфлацијата на поудобно ниво нудат помали изгледи за раст во годините што доаѓаат“, се додава во извештајот.
Наодите се попесимистички од најновите прогнози на Меѓународниот монетарен фонд (ММФ). Таа институција во октомври предупреди дека повеќе од една третина од светската економија ќе се намали и дека има 25 проценти шанси глобалниот БДП да порасне за помалку од 2 отсто во 2023 година, што го дефинира како глобална рецесија.
И покрај тоа, до 2037 година, светскиот бруто-домашен производ ќе се удвои, бидејќи економиите во развој ќе ги достигнат побогатите. Промената на рамнотежата на силите ќе доведе до тоа регионот на Источна Азија и Пацификот да сочинуваат над една третина од глобалното производство до 2037 година, додека уделот на Европа се намалува на помалку од една петтина.
Центарот за економија и бизнис-истражувања како база ги зема податоците од Светската економска перспектива на ММФ и користи внатрешен модел за да ги предвиди растот, инфлацијата и девизните курсеви.
Кина сега нема да ги престигне САД, како најголема светска економија, најрано до 2036 година, односно шест години подоцна од очекуваното. Тоа е одраз на кинеската политика на нулта ковид и растечките трговски тензии со Западот, кои го забавија нејзиното проширување.
Центарот за економија и бизнис-истражувања првично очекуваше ваква промена во 2028 година, па лани се премисли и прогнозата за Кина да ги надмине САД ја одложи за 2030 година. Сега од Центарот сметаат дека точката на вкрстување нема да се случи до 2036 година, а може да дојде дури и подоцна ако Пекинг се обиде да ја преземе контролата врз Тајван и се соочи со одмазднички трговски санкции.
„Последиците од економската војна меѓу Кина и Западот би биле неколкупати потешки од она што го видовме по рускиот напад врз Украина. Речиси сигурно ќе има многу остра светска рецесија и оживување на инфлацијата. Но штетата за Кина би била многукратно поголема и тоа би можело да го спречи секој обид на оваа држава да ја води светската економија“, велат од Центарот за економија и бизнис-истражувања.
Центарот за економија и бизнис-истражувања, исто така, предвидува и дека:
*До 2035 година Индија ќе стане трета економија со 10 илјади милијарди долари.
*Актуелната трета најголема економија во светот, Обединетото Кралство, до 2032 година ќе се симне на шестото место по големина на економијата во светот. Британија веќе нема да расте побрзо од европските земји поради отсуството на политики ориентирани кон раст, како и поради недостигот од јасна визија за својата улога надвор од ЕУ.
*Франција во текот на следните 15 години ќе стане седма економија во светот.
*Економиите во развој што се богати со природни ресурси ќе добијат „значителен поттик“, бидејќи фосилните горива играат важна улога во преминот кон обновлива енергија.
*Глобалната економија е далеку од нивото на БДП од 80.000 долари по жител, на кое емисиите на јаглерод се одвојуваат од растот, што значи дека се потребни дополнителни политички интервенции за да се постигне целта за ограничување на глобалното затоплување на само 1,5 степен над прединдустриските нивоа.
.webp){kind=icon}
