.webp){kind=icon}
Уругвај стана првата земја што се насочи кон целна инфлација во Јужна Америка, која почна да ги намалува трошоците за задолжување, по што економијата влезе во техничка рецесија во втората половина на 2022 година.
Одлуката за намалување на основната стапка за четвртина поен, на 11,25 проценти, ги изненади пазарните учесници анкетирани од централната банка, кои очекуваа креаторите на политиката да ја остават стапката непроменета периодов. Централната банка на оваа земја ја покачи клучната стапка за 700 базични поени, на 11,5 проценти, во периодот од август 2021 година до декември 2022 година, бидејќи инфлацијата минатата година се забрза на речиси 10 отсто.
Потегот на монетарната власт го означи првото намалување на стапката откако централната банка повторно ја прифати референтната стапка како своја главна алатка за дејствување во септември 2020 година.
Движење на потрошувачките цени и клучната каматна стапка во Уругвај / Bloomberg Mercury
„Растот се забави откако сушата го погоди земјоделскиот сектор, еден од најголемите уругвајски извозници, што ја натера централната банка да ја олесни политиката за стимулирање на економијата“, рече во интервју Алберто Ландеира, економист во брокерската куќа „Пуенте“ (Puente).
„Главната причина поради која централната банка почна да ги намалува стапките пред другите земји е затоа што имаме негативен производствен јаз. Сушата има големо влијание врз економијата“, рече Ландеира.
Големите централни банки низ регионот ги задржаа каматните стапки на повеќегодишни највисоки нивоа дури и во услови кога инфлацијата постепено се повлекува откако достигна двоцифрена вредност во неколку земји во текот на 2022 година. Креаторите на политиките се загрижени дека предвременото олеснување може да се судри со пораст на потрошувачките цени, што би го нарушило нивниот кредибилитет. Во соседен Бразил економските последици од високите каматни стапки го поттикнаа претседателот Луис Инасио Лула да Силва јавно да ја казни својата централна банка за задушување на растот.
Централната банка на Уругвај, која е под водство на економистот Диего Лабат, се најде на удар на извозниците, кои велат дека високите трошоци за задолжување придонесуваат за преценета валута. Националната валута оваа година порасна за 2,3 проценти, откако лани доби околу 12 отсто на својата вредност. Силната валута помогна да се намали инфлацијата, која во март падна на најниско ниво во последните 20 месеци и изнесува 7,3 проценти. И покрај тоа, учесниците на пазарот се скептични дека креаторите на политиката ќе ја постигнат својата цел, при што најновото месечно истражување на централната банка, спроведено меѓу аналитичарите, предвидува инфлација од 6,95 проценти во декември 2024 година.
Во Централна Америка минатиот месец Костарика ја намали водечката каматна стапка на 8,50 од 9 проценти.
