Кина започна шестмесечна кампања за поттикнување на продажбата на автомобили и поголема употреба на овие возила во руралните области на земјата, имајќи предвид дека продажбата на најголемиот светски пазар на автомобили слабее.
Иницијативата што ја покрена Министерството за трговија ќе почне да се спроведува овој месец. Како дел од неa, финансиските институции ќе бидат охрабрени да даваат кредитна поддршка за купување автомобили, а локалните самоуправи и производителите на автомобили да понудат субвенции и попусти, особено за купување електрични возила, се вели во соопштението на кинеската влада.
Еден од клучните приоритети е промовирање на транзицијата кон електрични возила во 11.000 окрузи и села низ Кина, при што Пекинг вети дека ќе работи на подобрување на инфраструктурата за полнење на овие возила во руралните области и ги притиска локалните власти да поддржат мерки како што се субвенции за потрошувачите, се додава во соопштението.
Високи функционери во Кина постојано изјавуваат дека очекуваат транзицијата кон електрични возила и воопшто, растот на продажбата на автомобили, да бидат многу важни ставки оваа година. Претходно, Државниот совет објави дека ќе ја продолжи одлуката за даночни олеснувања за купување автомобили напојувани од „нова енергија“, додека во мај агенцијата за економско планирање на земјата и енергетското биро објавија повик за изградба на поголема инфраструктура за полнење на овие возила надвор од големите градови.
Bloomberg Mercury
Кина е најголемиот пазар во светот за т.н. зелени автомобили, а во однос на 2021 година, во 2022 година, забележа раст од 95 отсто во оваа област. Но, расположението постепено опаѓа, бидејќи паѓа продажбата на електрични возила, додека хибридите забележаа раст од 41 отсто во периодот од јануари до мај, што е значително пониско од 120 отсто во истиот период лани. Вкупниот пазар на автомобили има благ раст од 4,2 отсто во првите пет месеци од оваа година, според Кинеската асоцијација за патнички автомобили.
„Ова е како да започнете огромна рекламна кампања за автомобилската индустрија“, вели Јеил Џанг од шангајската консултантска компанија „Аутомотив форсајт“ (Automotive Foresight).
Субвенциите варираат во зависност од регионите, па и натаму не е јасно колкава сума ќе се одвои за набавка на автомобили, имајќи предвид дека многу локални самоуправи се соочуваат со затегнат буџет и големи долгови.
Владата на Нанџинг, третиот по големина град во источна Кина со население од 9,5 милиони, соопшти дека ќе додели ваучери во вредност од 35 милиони јуани (5 милиони долари) за купување автомобили почнувајќи од 6 јуни, со субвенции за секое купување на автомобил од по 5.000 јуани. Шенжен, центар за технологија и производство, додели 82 милиони јуани на потрошувачите кои купиле зелени автомобили оваа година.
Некои производители на автомобили особено се заинтересирани за повикот да промовираат електрични автомобили во руралните области.
Заедничкото вложување на „Џенерал Моторс“ (General Motors) со „САИК Мотор“ (SAIC Motor) и „Вулинг Моторс“ (Wuling Motors Holdings) ја намали цената на популарното електрично возило „хонгуанг мини“ (Hongguang Mini) за 13.000 јуани до крајот на јуни. Државната „Чери“ (Chery Automobile) понуди попуст од 1.000 јуани и доживотно бесплатно сервисирање за некои модели на електрични автомобили.
Ценовната војна во Кина што „Тесла“ (Tesla) ја започна на почетокот на оваа година не покажува знаци на намалување.
Вкупно 753 варијанти на патнички возила, или околу 25 отсто од типовите возила на пазарот, забележаа пад на нивните цени за повеќе од 10.000 јуани во трите месеци до крајот на мај, според податоците објавени од „Чајна Ауто Маркет“ (China Auto Market). Овој процент се зголемува веќе седум месеци по ред.
Акциите на автопроизводителите благо пораснаа во петокот. Уделот на САИК порасна за 1,4 отсто, додека уделот на БЈД (BYD Co.), најголемиот кинески производител на електрични возила, забележа пораст од 1,2 отсто во Хонгконг. Уделот на „Гили“ (Geely Automobile Holdings) се зголеми за 1,4 отсто.
.webp){kind=icon}
