Глобалната економија и инфлацијата досега се покажаа изненадувачки отпорни на серијата зголемувања на каматните стапки, што ги наведе шефовите на централните банки во средата да повикаат на дополнително заострување.
На собирот во Синтра, Португалија, претседателот на Федералните резерви, Џером Пауел, претседателката на Европската централна банка, Кристин Лагард, и гувернерот на Банката на Англија, Ендрју Бејли, рекоа дека имаат начини да ја зауздат високата инфлација.
„Иако политиката е рестриктивна, таа можеби не е доволно рестриктивна и не е рестриктивна доволно долго“, рече Пауел на панел-дискусијата организирана од ЕЦБ, во која беше вклучен и гувернерот на Банката на Јапонија, Казуо Уеда.
Истакнувајќи дека повеќето креатори на политиката на ФЕД очекуваат зголемување на каматните стапки најмалку уште двапати оваа година, Пауел ја остави отворена вратата за централната банка да ги зголеми трошоците за позајмување на два последователни состанока, откако ФЕД направи пауза од заострување на состанокот одржан овој месец.
Колку далеку ќе одат?
Bloomberg
Лагард сугерираше дека зголемувањето на каматните стапки на ЕЦБ наредниот месец е практично сигурно, иако таа беше помалку јасна за тоа што ќе прават креаторите на политиката на нивниот следен состанок, кој ќе се одржи септември. Бејли вети дека ќе направи сè што е потребно за инфлацијата да се врати на два отсто, откако БОЕ месецов ги изненади инвеститорите со зголемување на стапките за половина процентен поен.
Се чинеше дека Уеда е црната овца, со тоа што посочи дека јапонските стапки се на чекање бидејќи основната инфлација останува под два процента. И покрај тоа, тој го истакна потенцијалот за промени доколку јапонската централна банка увиди дека цените би можеле да пораснат за два отсто следната година.
Минатата година ФЕД, ЕЦБ и БОЕ го започнаа најагресивното заострување на монетарната политика во последните децении, во обид да ја вратат инфлацијата на целта од два процента.
„Малку збунети“
И покрај стравувањата дека тоа ќе предизвика глобална рецесија, светската економија досега се држеше. Но, базичната инфлација е исто така постојана.
„Во целиот свет централните банкари велат: 'Ние сме решени', но мислам дека тие се малку збунети, бидејќи мерките досега имаа мал ефект“, вели Рагурам Раџан, поранешен гувернер на индиската централна банка и поранешен главен економист на Меѓународниот монетарен фонд.
Говорејќи на телевизијата „Блумберг“, Раџан додаде: „Ако ја погледнете базичната инфлација, да, таа падна во текот на годината, но се чини дека се стабилизира - и тука е загриженоста“.
Што вели „Блумберг економикс“...
„ЕЦБ и Федералните резерви звучат како да се блиску до врвот на каматните стапки и преминаа кон говор за времетраењето на терминалната стапка, додека Банката на Англија сè уште се фокусира на тоа колку високо да отиде. Конечно, Банката на Јапонија нема да оди никаде во скоро време“.
- Дејвид Пауел, Ана Вонг, Ден Хансон и Таро Кимура
Пауел и неговите колеги од ФЕД ќе добијат уште едно отчитување за инфлацијата в петок, кога ќе бидат објавени податоците за индексот на потрошувачки цени во мај.
Економистите прогнозираат дека вкупната инфлација според таа мерка ќе забави на 3,8 отсто од 4,4 отсто во април, најмногу поради пониските цени на горивата. Но, според среднорочните прогнози на економистите анкетирани од „Блумберг“, базичната инфлација, која ги исклучува трошоците за храна и енергија и која креаторите на политиката ја сметаат за поиндикативна за општиот тренд, се очекува да остане непроменета на 4,7 отсто.
Прогноза на Пауел
Пауел рече дека базичната инфлација нема да падне на два процента до 2025 година и изрази загриженост дека колку подолго инфлацијата останува висока, толку е поголем ризикот таа да се вкорени во економијата.
.webp){kind=icon}
Во моментов нема коментари за веста. Биди прв да коментира...