.webp){kind=icon}
Кинеската економија дополнително забави во текот на јули поради сè полошата ситуација на пазарот на недвижнини, како и заради тоа што продолжува примената на строги мерки во ограничувањето на движењето поради коронавирусот. Неочекуваното кратење на каматните стапки веројатно нема многу да помогне сè додека двата споменати фактори и натаму влијаат на тамошната економија.
Малопродажбата, индустриското производство и инвестициите бележат забавување и остварените резултати се под економските прогнози. Стапката на невработеност за возраста од 16 до 24 години се искачи на рекордни 19,9 проценти, што создава главоболки за лидерите на Комунистичката партија во период кога се подготвуваат за конгрес, кој што на претседателот Си Џинпинг би требало да му донесе трет мандат.
За експертите економските податоци за месец јули се многу алармантни и за да се прекине натамошно забавување властите би требало да обезбедат голема поддршка во сите сегменти, од недвижнините до политиките за Ковид.
И довербата е во криза
Податоците покажуваат дека има криза и кога станува збор за довербата меѓу кинеските претпријатија и домаќинствата, што претставува дополнителна закана за светската економија во моменти кога побарувачката на глобално ниво буквално за сите производи е под голем притисок. Истовремено, на кинескиот пазар на недвижнини ситуацијата е сè полоша, а и цените на суровините, како што се железото и бакарот, се во пад.
Приносите на кинеските обврзници и вредноста на јуанот почнаа да се движат во надолна линија, додека на берзите владее несигурност. Позитивниот тренд на азиските берзи ослабна, а вредноста на американскиот долар почна да расте откако инвеститорите ги апсорбираа новите податоци за движењата на кинеската економија и неочекуваното намалување на каматните стапки.
Кинеските власти веќе ја отфрлија можноста за воведување нови стимулации и ветуваат дека ќе продолжат со својата строга политика, т.н. нулта Ковид политика, што од локалните власти бара затворање на компаниите и ограничување на движењето на граѓаните кога ќе дојде до пошироко распространување на вирусот, како што е во моментов случајот со излетничкиот остров Хаинану. Сето тоа ги загрозува проценките за раст во остатокот од годината, а економистите своите прогнози ги ревидираа и на под 4 проценти.
Економијата во проблеми
Кинеската централна банка ги намали едногодишната и седумдневните каматни стапки за 0,1 отсто, што според економистите е потег кој нема да има преголемо влијание бидејќи поради Ковид мерките компаниите и домаќинствата не се многу засинтересирани за подигнување кредити. Но, намалувањето на каматите покажува дека целата економија е во проблеми.
Забавувањето на кинеската економија, што почна во март откако властите во десетина градови воведоа строги мерки за ограничување на движењето за да го спречат ширењето на вирусот, се прели и на други големи економии, како Германија и Јужна Кореја поради намалувањето на побарувачката за произведените стоки.
Според тоа, прогнозите се дека економскиот раст во втората половина ќе биде значајно отежнат поради политиката на нулта Ковид, негативниот тренд на пазарот на недвижнини и сè поверојатниот пад на извозот поради ослабувањето на глобалната економија.
Задоцнета поддршка
Аналитичарите стравуваат дека поддршката од Пекинг можеби доаѓа предоцна и е преслаба. Сметаат дека прогнозите се преоптимистични за растот во втората половина од годинава и затоа очекуваат дека ќе има повторно ревидирање на прогнозата за раст во следниот период.
На клучниот состанок за економската политика во јули претседателот Си и партиските лидери дадоа песимистичен преглед на економскиот раст но, не најавија нови стимулативни мерки и програми. Сепак, неофицијално признаа дека не е остварлива целта државата да ја заврши годината со економски раст од 5,5 проценти.
