Растот на обврзниците продолжува со очекувања за намалување на каматите од Фед

Американските државни обврзници ги задржаа добивките откако трговците ги зголемија обложувањата дека Федералните резерви ќе ги намалат каматните стапки на следниот состанок.

Извештајот за инфлацијата објавен во вторникот, кој инвеститорите во голема мера го оценија како поволен, заедно со серијата изјави на американски функционери со повик за пониски трошоци за задолжување, ја засили основата за намалување во септември.

Договорите за размена на каматните стапки сега целосно ја вклучуваат во процените промената од четвртина процентен поен следниот месец, а некои од трговците се обложуваат и на намалување од 50 базични поени. Приносот на референтната 10-годишна обврзница ја заврши трговската сесија во средата со пад од шест базични поени, на 4,23 отсто, пред денешниот ден, кога се тргува без поголеми промени.

Растот покажа колку драстично се променило расположението на пазарот во споредба со пред две недели, кога очекувањата за намалување на каматите во септември беа под 50 отсто. Промената започна по објавувањето на слабиот извештај за вработеноста – што кулминира со разрешувањето на директорот на Бирото за трудова статистика – а што ја засили кампањата на претседателот Доналд Трамп за притисок врз Федералните резерви да ги намалат трошоците за задолжување.

Министерот за финансии Скот Бесент дополнително го поддржа тој повик во средата, повикувајќи ги креаторите на политики да го искористат септемврискиот состанок за започнување циклус на намалување.

„Можеме да влеземе во серија на намалувања на каматите, почнувајќи со намалување од 50 базични поени во септември“, изјави Бесент во телевизиско интервју за „Блумберг сервејленс“ (Bloomberg Surveillance). „Веројатно треба да бидеме за 150–175 базични поени пониско“.

Претседателот на Фед во Чикаго , Остен Гулсби, изјави дека есенските состаноци ќе бидат „активни“ додека креаторите на политики ги разгледуваат мешаните економски податоци.

„Тонoт на пазарот се префрли во режим на олабавување“, рече Анџело Манолатос, стратег за каматни стапки во „Велс Фарго“ (Wells Fargo). „Иако извештајот за потрошувачките цени е далеку од сигурен поттик за Фед, тој сепак ја задржува централната банка на курс за намалување во наредните месеци“.

Што велат стратезите на „Блумберг“

„Приносите нагло паѓаат низ целата крива, а фјучерсите на федералните фондови вградуваат поостри намалувања. Со други зборови, очекувањата за каматните стапки нагло опаѓаат“.

- Себастијан Бојд, макростратег од „Маркетс лајв“ (Markets Live)

Последниве недели инвеститорите масовно вложуваат во договори за размена, опции и директно во американски државни обврзници, обложувајќи се дека умерената инфлација и слабоста на пазарот на трудот ќе му овозможат на Фед да започне со намалување.

Тоа, исто така, ги поттикна обложувањата дека Фед ќе ги намали каматните стапки за повеќе од 25 базични поени во септември. Во вторникот трговците вложија дополнителни околу два милиони американски долари во опција поврзана со стапката на обезбедено прекуноќно финансирање (СОФР), која би добила на вредност доколку дојде до такво намалување на каматите.

Инвеститорите сега го насочуваат вниманието кон годишниот симпозиум на Фед во Џексон Хол, Вајоминг, каде што е предвидено да говори претседателот Џером Пауел.

„Пазарот е убеден во намалување од најмалку 25 базични поени во септември“, рече Леа Трауб, менаџер на портфолио во „Лорд Абет“ (Lord Abbett). „Ако Фед не е толку уверен во потребата од намалување, тогаш Пауел најверојатно ќе го искористи говорот во Џексон Хол за да го сигнализира тоа“.

Се зголемува отворениот интерес за опциите на СОФР
Позициите растат кај износите поврзани со обложување на намалување на каматите на Фед за половина поен

Bloomberg

Со повеќе од еден месец до состанокот на централната банка на 16–17 септември, оптимистите за државните обврзници ќе треба да издржат уште еден голем извештај за инфлацијата, како и клучните податоци за вработеноста.

„Септември не е завршена работа“, изјави за телевизијата „Блумберг“ главнaта економистка на „Њу сенчри адвјзорс“ (New Century Advisors), Клаудија Сам. „Сè уште немаме податоци што ќе ја обезбедат таа одлука“.

Засега во фокусот се обложувањата дека Фед ќе усвои пофлексибилна политика.

Според пресметките на „Блумберг њуз“, опциите поврзани со септемвриските договори на СОФР, за кои моменталната премија изнесува околу пет милиони американски долари, би можеле да донесат добивка до 40 милиони доколку пазарот почне да очекува намалување на каматите за 50 базични поени во тој месец.