Листа на држави со најдобри пензиски системи во светот

Холандија и годинава го задржа првото место на глобалниот пензиски индекс, додека Сингапур за првпат се проби меѓу најдобрите.

Исланд, Данска и Израел го сочинуваат остатокот од петте земји што добија рејтинг А на годинашниот Глобален пензиски индекс на институтот „Мерсер ЦФА“. Извештајот е објавен денеска и оценува 52 пензиски системи врз основа на оценките за нивната адекватност, одржливост и интегритет.

 

 

Сингапур постојано го зајакнуваше својот пензиски систем во текот на годините, подигнувајќи го својот глобален ранг, рече Тим Џенкинс, главен автор на извештајот и партнер во „Мерсер“ во Сиднеј. Во поново време службениците се фокусираа на зголемување на транспарентноста – овозможувајќи им на луѓето подобро да разберат колкава пензија да очекуваат.

Пензискиот систем на Сингапур е изграден околу Централниот пензиски фонд, кој ги опфаќа сите вработени граѓани и постојани жители преку задолжителни придонеси и од работниците и од работодавците. Од 2009 година градот-држава имаше оценка Ц на глобалниот индекс, сѐ до минатата година, кога се искачи на Б+.

„Сингапур го помина целиот пат од оценката Ц до оценката A со помош од економијата“, рече Џенкинс, додавајќи дека метриката за одржливост на индексот го зема предвид долгорочниот економски раст.

Bloomberg Mercury

 

На годинашното рангирање, САД се најдоа на 30-то место, Велика Британија на 12-то, а Јапонија на 39-то место. Индија беше рангирана најниско со рејтинг Д, веднаш зад Аргентина, Филипините и Турција, кои исто така беа оценети со оценка Д. Австралија, чиј пензиски систем е високо ценет на глобално ниво, падна за едно ниво, на седмото место, веднаш под Шведска.

Авторите предупредуваат дека зголемената глобална неизвесност значи дека владите сè повеќе се стремат да го насочат капиталот на пензиските фондови кон националните приоритети.

„Прописите и владините активности – од даночните политики до инвестициските мандати – длабоко го обликуваат начинот на кој пензиските фондови можат да го распределат капиталот“, изјави Маргарет Франклин, претседателка и извршна директорка на Институтот ЦФА.

„Со оглед на тоа што некои системи се потпираат на пензиските фондови за насочување инвестиции што се сметаат за национален интерес, професионалната инвестициска заедница мора да се заштити од несаканите последици што можат да произлезат кога мандатите или ограничувањата го нарушуваат системот“, посочи таа.