Записникот од седницата на Фед сигнализира - повеќето членови се за намалувања на каматните стапки

Повеќето претставници на Федералните резерви сметаат дека дополнителни намалувања на каматните стапки ќе бидат соодветни доколку инфлацијата продолжи постепено да опаѓа, иако остануваат поделени околу тоа кога и колку да се намалуваат каматните стапки, покажува записникот од декемвриската седница на централната банка.

Записникот од состанокот на Комитетот за отворен пазар од 9–10 декември, објавен во вторник во Вашингтон, укажува на тешкотиите со кои се соочиле креаторите на политиката при донесувањето на најновата одлука, која умерено ги зацврсти очекувањата дека Федералните резерви ќе ги задржат каматните стапки непроменети и на следната седница во јануари.

„Неколкумина од оние кои го поддржаа намалувањето на референтната каматна стапка на оваа седница укажаа дека одлуката била многу тесна или дека исто така би можеле да ја поддржат и опцијата таргет-опсегот да остане непроменет“, се наведува во записникот објавен во вторник во Вашингтон.

По објавувањето на записникот, веројатноста за намалување на каматните стапки во јануари, заснована на фјучерс договори за федералната фондовска стапка, благо се намали на околу 15 проценти.

Гласањето во корист на намалување, во услови на силно поделена комисија, ја покажува и понатаму силната улога на претседателот Џером Пауел, вели Стивен Стенли, главен економист за САД во „Сантандер Капитал“ (Santander US Capital Markets).“.

„Комитетот можеше лесно да се одлучи во која било насока, а фактот што Комитетот за отворен пазар на Федералните резерви – ФОМК (Federal Open Market Committee — FOMC) сепак се реши за намалување на каматните стапки, претставува јасен показател дека претседателот Пауел имал клучно влијание врз одлуката“, напиша Стенли во анализата.

Официјалните лица овој месец со девет гласа „за“ и три „против“ изгласаа намалување на клучната каматна стапка за четврт поен, трет пат по ред, на опсег од 3,5 до 3,75 проценти. Членот на Управниот одбор Стивен Миран гласаше против, барајќи намалување од половина поен, додека претседателот на Федералните резерви во Чикаго Остин Гулсби и првиот човек на огранокот на Канзас, Џеф Шмид гласаа против во корист на задржување на стапките непроменети.

Проекциите за каматните стапки за 2025 година укажаа на уште подлабоки поделби во пошироката група од 19 креатори на политиката. Шестмина од нив го изразија своето противење на намалувањето, препорачувајќи клучната стапка на крајот од годинава да остане во опсег од 3,75 до 4 проценти, односно на нивото од пред декемвриската седница.

Во согласност со тие проекции, записникот покажува дека дел од официјалните лица сметале дека „најверојатно ќе биде соодветно таргет-опсегот да остане непроменет одреден период по намалувањето што беше направено на оваа седница.“

Иако средната проекција на каматната стапка објавена по седницата укажуваше на едно намалување од четврт поен во 2026 година, индивидуалните проекции значително се разликуваа. Инвеститорите, пак, очекуваат најмалку две намалувања во текот на следната година.

Длабоки поделби

Записникот и понатаму упатува на значителни разлики меѓу креаторите на политиката околу тоа дали поголем ризик за економијата на САД претставува инфлацијата или невработеноста.

„Повеќето учесници забележаа дека придвижување кон поприродна монетарна позиција би помогнало да се спречи можноста од поголемо влошување на состојбата на пазарот на трудот“, се наведува во записникот.

Во исто време, се додава: „Неколку учесници укажаа на ризикот од вкоренување на повисоката инфлација и предложија дека понатамошно намалување на референтната каматна стапка во услови на зголемени инфлаторни сигнали би можело да биде погрешно протолкувано како намалена посветеност на целта за инфлација од 2 проценти.“

Во изјавата за новинарите по седницата, претседателот Пауел оцени дека Федералните резерви веќе ги намалиле каматните стапки доволно за да спречат посериозно влошување на состојбата на пазарот на трудот, задржувајќи ги истовремено на ниво кое и понатаму врши притисок врз инфлацијата.

Официјалните лица работеа со ограничен обем економски податоци поради затворањето на федералната влада кое траеше во текот на цел месец октомври и речиси половина од ноември. Сепак, креаторите на политиката забележаа дека новите податоци во наредните недели може да им помогнат во нивните проценки.

„Некои од учесниците кои се залагаа или можеа да ја поддржат опцијата таргет-опсегот да остане непроменет, оценија дека пристигнувањето на значителен обем податоци за пазарот на трудот и инфлацијата во периодот меѓу двете седници би било корисно за правилна процена дали намалувањето на каматната стапка е навистина оправдано“, се наведува во записникот.

Од одржувањето на седницата наваму, новите податоци малку придонесоа за надминување на поделбите во Федералните резерви. Во ноември невработеноста порасна на 4,6 отсто, што е највисоко ниво од 2021 година, додека потрошувачките цени пораснаа помалку од очекуваното. Овие податоци ја зацврстија позицијата на оние кои се залагаат за пониски каматни стапки.

Сепак, економијата во третиот квартал порасна со годишна стапка од 4,3 отсто, најбрз раст во последните две години, што веројатно ја засили загриженоста за инфлацијата кај оние што се спротивставија на намалувањето во декември.