Батерии колку 700 нуклеарни реактори чекаат со години приклучување на мрежата

Бидејќи проектите за складирање енергија ја преплавуваат редицата за приклучување, скапите надградби на електроенергетската мрежа потребни за тие да почнат да работат го продолжуваат чекањето.

Побарувачката за батерии нагло порасна со зголемувањето на потрошувачката на електрична енергија низ САД, поттикнато од растечките енергетски потреби на центрите за податоци и сè поголемата електрификација. Но, истовремено станува сè потешко тие да се приклучат на електроенергетските мрежи.

Падот на цените ги направи батериите попривлечни. Но, по децении стагнација на инвестициите, електроенергетските мрежи брзаат да ги направат надградбите потребни за нивно приклучување, што создава притисок врз снабдувањето со трансформатори, прекинувачи и друга опрема. Како што тие надградби доцнат, проектите за складирање енергија се натрупуваат во редиците за приклучување низ целата земја.

„Консолидејтед Едисон“ (Consolidated Edison Inc.), голема комунална компанија во сојузната држава Њујорк, на пример, вели дека во изминатите две години обемот на проектите за батериско складирање што чекаат приклучување пораснал за 300 отсто. Во Калифорнија, регулаторите очекуваат дека доцнењата во надградбата на мрежата ќе ги закочат енергетските проекти низ целата сојузна држава.

„Целиот процес на приклучување на овие нови електроцентрали навистина заглави и се создаде тесно грло“, рече Џозеф Ранд, истражувач за енергетска политика во Националната лабораторија „Лоренс Беркли“. „На некој начин, тоа го наруши историскиот процес според кој операторите на преносните мрежи работеа речиси 20 години.“

На национално ниво, проекти за складирање енергија со капацитет од околу 750 гигавати - приближно еднакво на производствениот капацитет на повеќе од 700 нуклеарни реактори - чекаат приклучување на мрежата, покажува истражувањето на лабораторијата. Нема да бидат изградени сите овие проекти. Многу инвеститори веќе ја напуштиле редицата поради доцнењата. Сепак, времето на чекање се зголемува:  средното време на чекање изнесувало пет години во 2025 година, во споредба со една и пол година во 2015 година.

Се очекува напливот на проекти за батерии да продолжи. „Вуд Мекензи“ (Wood Mackenzie), консултантска компанија за енергетика, прогнозира дека американскиот пазар за складирање енергија ќе се зголеми четирикратно во следните шест години.

Со складирање електрична енергија кога цените се ниски и има изобилство енергија од обновливи извори, а потоа нејзино ослободување кога побарувачката расте, батериите можат да помогнат да се намалат сметките за електрична енергија на потрошувачите, да се декарбонизира користењето електрична енергија и да се намали оптоварувањето на мрежата. Тоа ги прави особено корисни во жешките летни денови кога потрошувачите масовно ги вклучуваат климатизерите.

„Дефинитивно видовме голема корист од тоа што имаме повеќе батерии во мрежата и од нивната способност да помогнат во задоволувањето на најголемата побарувачка во вечерните часови“, рече Даниел Милс, директорка за развој на инфраструктурната политика во „Калифорнија индепендент систем оператор“ (California Independent System Operator), кој управува со енергетскиот пазар во сојузната држава.

Сепак, додавањето нови батерии во мрежата не е едноставно. Операторите на мрежите често мора да изградат нова инфраструктура, како далноводи или трафостаници, за да овозможат проток на електрична енергија во двете насоки.

Недостигот од клучна опрема, во меѓувреме, ги зголеми трошоците за изградба и времето потребно за надградба на мрежите, поради што комуналните компании тешко успеваат да градат доволно брзо. Недостигот од квалификувани работници дополнително ги забавува. „Комбинацијата од трошоците и ограничениот број работници е во сржта на проблемот“, рече Алисон Фини, истражувачка аналитичарка во „Вуд Мекензи“.

Во Калифорнија, „ПГ енд Е“ (PG&E Corp.), најголемата комунална компанија во сојузната држава, во јануари им соопшти на регулаторите дека една од главните причини за доцнењата се долгите рокови за набавка на специјализирана опрема. Набавката на одредени прекинувачи може да трае речиси четири години, покажуваат податоците на компанијата, која пријавила зголемување од 300 отсто на обемот на работа поврзана со приклучувањето на мрежата во споредба со претходните години.

Во Северна Калифорнија, на пример, доцнењата во надградбата на прекинувачите во трафостаница во округот Солано довеле до предвидени одложувања на два проекта за батерии со вкупен капацитет од 450 мегавати. Работите на далноводите во областа на Заливот доведоа во ризик од одложување дополнителни 800 мегавати капацитет за складирање енергија, покажуваат податоците на „ПГ енд Е“.

„Постојат некои фактори надвор од контролата на 'ПГ енд Е' што можат да влијаат врз времето потребно за приклучување, како што се ограничувањата во глобалните синџири на снабдување и доцнењата на страната на клиентите поврзани со дозволите и изведувачите“, рече во соопштение Пол Доерти, портпарол на компанијата.

Кај друг голем снабдувач со електрична енергија, „Садерн Калифорнија Едисон“ (Southern California Edison), незавршените надградби одложиле 13 гигавати нови капацитети за производство и складирање енергија, покажуваат податоците на државните власти.

Државните и федералните регулатори се обидуваат да ги скратат редиците, на пример, со давање приоритет на проектите што се во понапредна фаза наместо да се водат според принципот „прв дојден, прв услужен“, како и со воведување казни за повлекување од редицата за да ги обесхрабрат шпекулативните проекти.

„Видовме дека бројот на проекти во редицата се намалува, што мислам дека е показател дека работите се движат во вистинската насока“, рече Ранд, истражувачот од Националната лабораторија „Лоренс Беркли“.

Во Њујорк, „Кон Ед“ ги заостри условите за проектите за складирање енергија. Почнувајќи од минатата година, инвеститорите мора да помогнат во плаќањето на надградбите доколку нивните проекти би ја зголемиле побарувачката за електрична енергија над локалните максимални нивоа и би ја оптовариле инфраструктурата. Компанијата соопшти дека промените биле неопходни бидејќи добивала премногу барања во области со поблаги правила за зонирање, што, доколку сите биле одобрени, би ја преоптоварило нејзината опрема таму.

„Складирањето е клучно за транзицијата кон чиста енергија, но веруваме дека системот навистина има корист од складирање со соодветен капацитет, на соодветна локација, во вистинско време и со соодветни периоди за полнење и празнење“, рече Рагу Судакара, извршен директор во „Кон Ед“.

Според анкета спроведена од трговското здружение „Њујорк Бест“ (New York Battery and Energy Storage Technology Consortium - NY-BEST), новата методологија ги зголемила трошоците во просек за 21 милион долари по проект, што претставува 14-кратно зголемување. Како резултат на тоа, откажани се најмалку 25 проекти, покажуваат податоците на здружението. Застапниците на батериското складирање побараа од државните регулатори да ја натераат „Кон Ед“ да се откаже од новата политика.

„Таа направи голем број проекти за складирање енергија што беа одржливи да станат неодржливи“, рече Вилијам Акер, извршен директор на „Њујорк Бест“. „И така, таа навистина го запира развојот на ресурс што му е потребен на Њујорк“.