Пад на акциите на „Тесла“ и покрај зголемените испораки

Иако вкупните испораки на возилата на „Тесла“ (Tesla) се зголемија за два процента во четвртиот квартал од 2024 година во споредба со истиот период од 2023 година, инвеститорите не се целосно убедени. Скептицизмот е поттикнат од агресивните дисконтни политики - попусти и поволно финансирање на автомобили за да се стимулира побарувачката. Така, и покрај повисоките испорачани количини, приходите од автомобилското работење паднаа за осум проценти во К-4 2024 во споредба со К-4 2023 година. Заработката по акција е под очекуваното, имено, за К-4 2024 изнесува 73 центи, под очекуваните 77 центи. Светлата точка е што COGS (од англиски: cost of goods sold) по возило падна на рекордно ниско ниво - под 35.000 долари по возило, но агресивната ценовна политика изврши најголем притисок врз профитабилноста и ги намали оперативните резултати. Оперативната добивка забележа остар пад од дури 23 проценти во К-4 2024 година во споредба со К-4 2023 година.

Профитабилноста беше донекаде помогната од приходите од продажбата на регулаторни кредити, како и од складирањето енергија. Станува збор за високопрофитабилни бизниси - производството и складирањето енергија има бруто маржа од 30,5 проценти. Продажбата на регулаторни кредити ефективно има маржа од 100 проценти, бидејќи „Тесла“ обично секогаш добива вишок регулаторни кредити и ги препродава на други производители (кои не ги постигнале своите цели за производство на електрични автомобили). Овие дополнителни извори на приходи се многу добри за профитабилноста на „Тесла“.

Објавувањето на резултатите од четвртиот квартал од 2024 година доаѓа како студен туш, особено по жешкиот „bull run“ што започна по победата на Доналд Трамп на ноемвриските избори. Цената падна за 2,2 отсто по објавувањето на резултатите. Сепак, многу инвеститори замижуваат пред финансиската слика на „Тесла“, токму поради поврзаноста на Илон Маск со администрацијата на Трамп и долгорочните потенцијални придобивки во форма на регулатива (или недостаток на државен надзор) и даночниот третман. Поради тоа, акциите се вратија на просечните нивоа постигнати пред објавувањето на резултатите, во продолжено тргување по затворањето на берзата.

Инвеститорите можат да бидат задоволни од ликвидноста на „Тесла“. Имено, нето готовината од работењето во К-4 2024 година бележи пораст од 10 проценти во однос на К-4 2023 година, додека готовината на крајот на периодот бележи пораст од 26 проценти. Капиталните расходи (CAPEX) скокнаа за 21 отсто во К-4 2024 година во споредба со истиот период минатата година и сочинуваат 11 отсто од вкупните приходи. Иако оваа инвестициска стапка е повисока од стандардот во индустријата, „Тесла“ има простор за маневрирање во однос на понатамошни инвестиции и раст, токму поради нејзината солидна ликвидност. Плановите на „Тесла“ се желни за инвестиции, првенствено кога се разгледуваат плановите за проширување на капацитетот, инфраструктурата за полнење, како и развој на нови модели и платформи.

Што се однесува до основниот автомобилски бизнис на „Тесла“, очекувањата се претпазливо позитивни. Очекуваме испораките на возила да продолжат со номиналниот раст, а приходите во голема мера ќе зависат од ценовната политика. Доколку се остварат најавите за воведување нови модели кон средината на 2025 година, тоа ќе биде сериозен фактор за раст на приходите. Профитабилноста ќе биде под притисок, особено ако продолжат попустите, но со оглед на последователно намалување на трошоците за производство по возило и дополнителните, високо профитабилни бизниси, се очекува стабилна профитабилност на краток рок (со континуирана дисциплина на трошоците).

Ахиловата пета на „Тесла“ е ограничениот број на модели, а со тоа и падот на пазарниот удел во Америка и Кина. Конкуренцијата, на пример БЈД (BYD), исклучително агресивно воведува нови модели во сите сегменти и типови на шасија. Освежениот „модел ипсилон“ (Model Y), кој ќе биде достапен од март 2025 година е чекор во вистинската насока, но инвеститорите се желни за повеќе модели (особено подостапни модели, чие воведување суптилно се пренесува преку презентацијата на инвеститорите) за да се одржи конкурентноста . Кеш-кравата на „Тесла“ сè уште е платформата модел 3/ипсилон (Model 3/Y), а целосното автономно возење, потенцијалниот нов модел, флота-услугите и споделувањето на возењето, а со тоа и масовното производство на „сајберкеб“ (Cybercab) допрва треба да се материјализираат.