Новото електрично возило на Хонда тивко се прикрадува до Тесла

Две третини од возачите на теренци (СУВ) на Хонда (Honda) во САД го менуваат своето возило за друга Хонда. Тоа е ниво на лојалност слично на Ајфон (iPhone) што ретко се гледа во бруталниот бизнис со производство и продажба на автомобили, а му овозможува на првото електрично возило на овој производител на автомобили бргу да ја срози моќта на Тесла.

Најпродавани модели електрични возила во САД во третиот квартал Bloomberg Mercury

 

Хонда продаде околу 13.000 „Пролог“ (Prologue), својот електричен СУВ со средна големина, во тримесечјето заклучно со септември. Иако тоа е уште далеку од пазарниот удел на Тесла со „Модел ипсилон“ (Model Y), сепак најпродаваниот електричен СУВ, „Пролог“ е на петтото место меѓу американските електрични возила (ЕВ).

Голем дел од привлечноста на „Пролог“ лежи во тоа колку е незабележителен. Неговата почетна цена е 47.400 долари, или 400 долари помалку од просечната пазарна вредност на сите американски автомобили во септември, покажуваат бројките на „Блумберг интелиџенс“ (Bloomberg Intelligence).

Меѓутоа, за разлика од повеќето Хонди, „Пролог“ ќе ја прескокне бензинската станица и, во најголем дел, механичарската работилница. ЕВ на кои не им треба промена на маслото или филтри за воздух бараат речиси 1.000 долари помалку за одржување секоја година од сличните модели на гас. Хонда е веќе еден од најсигурните автомобилски брендови, а додавањето ново возило во понудата е само дополнителна предност на компанијата.

На прашањето зошто избрале „Пролог“, купувачите на Хонда најчесто ја наведуваат довербата во брендот, а потоа следуваат одговорите дека купувачите ја донеле таквата одлука поради вредноста, вели портпаролката на компанијата, Натали Кумаратне. Дополнително, речиси две третини од купувачите на „Пролог“ поседувале претходно Хонда, а скоро 80 проценти никогаш немале електрично возило.

И покрај сите муабети за забавување на пазарот на ЕВ во САД, продажбата во третиот квартал сугерира дека има голема толпа возачи кои едноставно чекаа подостапни опции или нови машини на батериски погон од познати брендови.

Продадени ЕВ во САД (нивниот удел во вкупната продажба во третиот квартал годинава е најголем и изнесува девет отсто) Bloomberg Mercury

 

Американските возачи купиле 346.309 автомобили и камиони на батерии во јули, август и септември, што е зголемување од пет проценти во однос на претходниот квартал и претставува скок од 11 отсто во однос на истиот период лани, покажуваат податоците од „Кокс аутомотив“ (Cox Automotive). ЕВ сочинуваа девет отсто од вкупната продажба на нови автомобили во САД во третото тримесечје, што е највисоко ниво досега.

Тесла го задржа својот електричен возен парк на улицате, испорачувајќи речиси 167.000 возила, вклучително и речиси 17.000 „Сајбертрак“ (Cybertrack). Сепак, неговиот удел на пазарот продолжи да паѓа и сега веќе е под 50 проценти бидејќи подостапните машини од „Кадилак“ (Cadillac), „Шевролет“ (Chevrolet), „Хонда“ (Honda) и други ги придобија љубопитните клиенти за ЕВ.