„Фиат панда“ може да биде меч со две сечила за „Стелантис“

„Стелантис“ (Stellantis) во Србија е во „низок старт“ за почеток на сериско производство на електричната и хибридната варијанта на новата „фиат панда“ (Fiat Panda) во Крагуевац, но заради поширок контекст треба да се погледнат трендовите на глобално ниво. Конкретно, финансиските тешкотии на автомобилскиот гигант во третиот квартал од 2024 година се јасни како ден. Нето приходите се намалени за 27 отсто во третиот квартал од 2024 година, во споредба со третиот квартал од 2023 година. Консолидираните испораки на возила паднаа за 20 отсто во третиот квартал од 2024 година, во споредба со истиот период минатата година, или за 279.000 возила, во апсолутен број. Падот на комбинираните продадени количини е 14,5 отсто на глобално ниво.

Ако внимателно ги погледнеме испорачаните количини, најголемо опаѓање има на северноамериканскиот пазар - пад на испорачаните количини за 36 проценти и пад на нето приходот од 42 проценти, во третиот квартал од 2024 година во споредба со третиот квартал од 2023 година. Европскиот пазар, исто така, бележи двоцифрена стапка на опаѓање на продадените количини - 17 проценти, а нето приходот падна за 12 проценти. Во однос на уделите на нето приходите, Европа и Северна Америка се доминантни пазари за „Стелантис“, со удели во нето приходите од 37,9 и 37,7 проценти соодветно во третиот квартал од 2024 година. Сите флуктуации на овие пазари се рефлектираат врз глобалното работење на „Стелантис“. Јужна Америка („третиот мотор на растот“ на „Стелантис“, со учество во нето приходите од 12,8 отсто) претставува светла точка и забележа раст на испораките од 14 отсто и најмал пад на приходите од 2 отсто (меѓу другото, поради негативните девизни разлики поврзани со бразилскиот реал). Како причина за падот на испораките, „Стелантис“ го наведува негативниот ефект од „количината и производствениот микс“.

Ако го разделиме овој термин, обемот беше под притисок од различни предизвици во производството и контролата на квалитетот, што предизвика одложување на одредени модели (некои примери – „цитроен Ц3“, „цитроен еркрос“ и „пежо 3008“). Како и другите европски производители, „Стелантис“ се наоѓа во технолошки расчекор, така што и предизвиците од транзицијата кон електрични возила исто така одиграа улога во текот на 2024 година. Проблем беа и акумулираните залихи, особено во Северна Америка, што исто така имаше негативен ефект врз количинската компонента. „Производствениот микс“ подразбира специфична понуда на модели и нивните соодветни цени. Поточно, негативниот ефект се однесува на помалата побарувачка за возила со повисоки маржи (и повисоки цени за потрошувачите) во премиум и СУВ сегментите. Слично на „Фолксаваген“, „Стелантис“не успеа да пласира поскапи модели (со повисока додадена вредност и поголем потенцијал за остварлива маржа). Но, за разлика од „Фолксваген“ , „Стелантис“ не успеа да ги пренесе зголемувањата на цените на потрошувачите (и со тоа да го ублажи падот на приходите), со оглед на фактот дека падот на приходите го надмина опаѓањето на обемот. Накратко, „Стелантис“ падна на тестот за ценовната политика во третиот квартал од 2024 година.

Следствено на тоа, „Стелантис“ претрпе сериозен пад на берзата во споредба со неговите главни конкуренти во Европа („Фолксваген“ и „Рено“). „Стелантис“ бележи најголем пад во периодот од 31.10.2023 до 31.10.2024 година - 28,4 проценти. Како што беше опфатено во нашиот преглед на„Рено“ за третиот квартал од 2024, компанијата успеа да лансира поскапи модели од својата понуда (која е значително освежена) и постигна позитивен раст на продажбата (и покрај падот на продадените количини). „Рено“ е единствениот меѓу трите најголеми европски производители кој забележа раст на акциите во овој период - максимум од 26,8 проценти. „Фолксваген“ помина нешто полошо од „Рено“ (пад од 16,5 отсто во горенаведениот период) и прогнозите за заработка на ниво од претходната година беа казнети на берзата, но процентуалниот пад на цената на акцијата е помал од оној на „Стелантис“, каде што намалувањата на обемот на продажба и приходите се далеку позначајни.

Очекувања

За „Стелантис“ се очекува дека притисокот врз растот на приходите, а со тоа и врз профитабилноста, ќе продолжи и во следниот квартал. „Стелантис“ ги ревидира своите очекувања за приспособена оперативна маржа и цели на опсег од 5,5 до 7 проценти (намалување од претходно дефинираните двоцифрени бројки). Долгорочното закрепнување зависи од побарувачката за нови модели на клучните пазари во Европа и Северна Америка, како и од ефективноста на транзицијата кон електрично портфолио.

Во најавите на „Стелантис“ за третиот квартал од 2024 година, не се споменуваше почеток на производството на „фиат панда“, инвеститорите и акционерите можат само да прават претпоставки. Потенцијалните причини за доцнење на производството може да лежат во постојаните тесни грла во развојот на софтверот, производството, како и прекините на синџирот на снабдување и намалената побарувачка за електрични автомобили. Поради овие фактори, „Стелантис“ веројатно мораше да даде приоритет на одредени модели (за кои сегашната побарувачка е стабилна), а имаше и потенцијални приспособувања на производните циклуси.

Ефектите од агресивното воведување на нови модели и чистењето на залихите се чекор во вистинската насока, но ќе бараат одливи на готовина и задушување на профитабилноста. Расчистувањето на залихите вклучува попусти на возила, промоции, купони и други стимулации наменети за клиентите. Што се однесува до новите модели, логично е што „Стелантис“ историски се потпира на брендот „фиат“ за да го задржи пазарниот удел во Европа. „Фиат панда“ со години е најпродаваниот автомобил во Италија, меѓу другото и поради неговата достапност. Третата генерација на „фиат панда“ е постојано најпродаваниот автомобил на италијанскиот пазар од 2013 до 2023 година. Сепак, достапноста на „фиат панда“ е меч со две сечила за „Стелантис“. Од една страна, прифатливиот модел привлекува поширок пазар и го штити пазарниот удел во веќе прилично заситениот Б-сегмент на компактни возила (особено од кинеската конкуренција, како и од економската конкуренција во Европа, на пример – „дачија сендеро“). Од друга страна, моделите со пониска цена имаат помал профитен потенцијал (иако производството на „фиат панда“е субвенционирано од српската влада), а може дополнително да го продлабочат проблемот од третиот квартал на 2024 година - негативниот ефект од „количината и производствениот микс“. Економијата на обем е клучна за овие типови возила, така што претпоставка е дека „Стелантис“ полага големи надежи во потенцијалот за побарувачката за новата „фиат панда“.

Во моментов нема коментари за веста. Биди прв да коментира...

Остави коментар