Нема крај на треската за брендирани станови во Дубаи

Пазарот на луксузни недвижности во Дубаи е сè почест избор за инвестирање за светските богаташи, а нивниот фокус е на станови и куќи потпишани од познати брендови, како „Булгари“ (Bulgari), „Кавали“ (Cavalli) и „Фор сизонс“ (Four Seasons).

Продажбата на овие имоти цвета во Дубаи, кој стана светска престолнина на т.н. брендирани резиденции поради налетот на странските купувачи кон ултралуксузни домови. Неделава еден купувач се согласи да плати 203,1 милиони дирхами (55,3 милиони долари) за стан со пет спални соби, со ознака на „Бакара“ (Baccarat), во проект што сè уште не е ни започнат. Според агенцијата за недвижности „Луксхабитат Сотби“ (Luxhabitat Sotheby's International Realty), со 14.000 дирхами по квадратен метар, тоа е највисоката цена платена за стан пред изградба.

Така, веќе е соборен стариот рекорд поставен во февруари, кога во зградата „Булгари лајтхаус“ беше продаден стан со пет спални соби за 160,3 милиони дирхами или 13.751 дирхами по квадратен метар. Тој облакодер ќе биде изграден на вештачки создаден остров во форма на морско коњче, во близината на хотелот и одморалиштето од истиот бренд.

Луксузните недвижности пораснаа во Дубаи бидејќи богатите станаа побогати за време на пандемијата на ковид-19, а руската елита бараше безбедни прибежишта за своите пари по инвазијата што нивната земја ја изврши во Украина. Цената на врвните недвижности скокна за 89 отсто во октомври во однос на претходната година, што е брзо закрепнување од падот што траеше од 2014 до 2020 година. Вилите во проектот „Фор сизонс резиденсес“ (Four Seasons Residences) во Дубаи, кои беа продадени во 2021 година за околу 40 милиони дирхами пред изградбата, сега вредат околу 100 милиони.

Брендираните резиденции стануваат голем дел од пазарот во Дубаи

Растот ја подигна вредноста на брендираните станови продадени во Дубаи во 2022 година на рекордни 25,3 милијарди дирхами, што претставува речиси една петтина од вредноста на вкупната трговија со станови во градот, според агенцијата „Најт Френк“ (Knight Frank).

„Нивната популарност расте на крилата на капиталот на ултрабогатите, кои продолжуваат да ги целат на луксузните куќи во градот“, вели Фајсал Дурани, шеф за истражувањето за Блискиот Исток во „Најт Френк“.

Градежниците сакаат да соработуваат со луксузни имиња затоа што често можат да ги продадат становите за 30 проценти повеќе од небрендираните резиденции, во зависност од регионот. Брендовите обично добиваат провизија за секоја продажба и годишен надоместок за управување. Тоа им носи на клиентите ниво на услуга што често далеку ги надминува проектите без бренд и тие имаат сигурност од име во кое можат да веруваат, што е особено важно за продажбата пред изградба и за оние купувачи што купуваат имоти на невидено, од странство. Апартманите исто така најчесто се целосно опремени.

Дубаи неодамна ја престигна јужна Флорида и стана место со најмногу брендирани проекти во светот. Сега има педесетина брендирани проекти во Дубаи, а уште неколку десетици се најавени дека ќе бидат изградени до 2030 година, според извештајот на „Савилс“ (Savills).

Рендер на облакодерот „Булгари лајтхаус“, брендирана луксузна резиденција што урива ценовни рекорди Извор: Meraas

Во големата метропола, појасот на развој во и околу вештачки создадениот Дубаи Крик (Dubai Creek) е најпопуларен за овие проекти. Некои од нив се токму на каналот, како станбениот комплекс со 28 единици на „Фор сизонс“ и куќите во низа, кои беа отворени за купувачите пред неколку недели. Според анонимни извори, меѓу ултрабогатите купувачи е и тениската ѕвезда Роџер Федерер.

Станарите можат да ги користат капацитетите на ресортот „Фор сизонс“. Речиси 40-те вработени во зградата се грижат за одржување, обезбедување, собна послуга и други услуги, како што се складирање храна и планирање настани.

„Луѓето што доаѓаат од странство, особено од Европа, бараат квалитет, приватност и добра услуга“, вели Џорџ Азар, главен извршен директор на „Луксхабитат Сотби“. „Не можам да ги именувам, но можете да замислите: имате шефови на држави, имате врвни возачи во Формула 1“.

Рендер од трикатен пентхаус со девет спални соби на врвот од „Булгари лајтхаус“ Извор: Meraas

Резиденциите „Бакара“ се планирани за појасот меѓу каналот и центарот на Дубаи, каде што се наоѓа Бурџ Халифа, сè уште највисоката зграда во светот. Купувачите веќе откупиле половина од 49. слободни станови, соопшти „Луксхабитат Сотби“.

Но брендирањето доаѓа со одредени ризици. „Името на брендот исто така може да се отстрани, иако тоа е ретко“, вели Скот Антел, основач на „Скотс ФЗ“ (Scotts FZ), правно советувалиште за угостителство. Постојат различни причини за тоа, на пример здружението на станари може да одлучи дека таксите за управување се прескапи, дека зградата не е добро одржувана или дека хотелот до станбениот дел е продаден. Или, во зависност од договорот, инвеститорот може да го смени брендот пред да се испорачаат становите. „Сметам дека тоа е крајно загрижувачко доколку сум клиент“, рече тој. „Купувам 'ферари', а добивам 'лада'. A тие велат: 'Еј, сепак е автомобил'. Aвтомобил e да, но не е тој за кој платив“.

Брендовите можат да бидат вплеткани и во скандали  - тоа е нешто што може да се случи кога во игра ќе влезат луксузните модни куќи, кои имаат тенденција да привлекуваат скандали. Дебрендирањето е ретко, но тоа се случи во 2016 година, кога жителите на Апер Вест Сајд гласаа за отстранување на името на Трамп од нивната зграда на Менхетн.

Но ниту еден од тие ризици не ги одвраќа инвеститорите што купуваат  - и веќе продаваат некои домови  - бидејќи се планираат уште повеќе. Единиците во „Фор сизонс“ на Крик се веќе препродадени. Уште една резиденција на „Фор сизонс“ е во изградба во финансискиот центар на градот.