Пазарот танцува по работ - Волстрит ја игнорира војната и се обложува на технолошките гиганти

Волстрит е моментално заробен во една од оние ретки и опасни фази кога цената на берзата ја игнорира реалноста, на терен - тивко затишје што претходи на страшна бура. Додека тензиите на Блискиот Исток полека се заоструваат со истекот на двонеделното примирје меѓу САД и Иран, индексот S&P 500 тврдоглаво ги брани своите историски максимуми, обложувајќи се на сценарио во кое дипломатијата ќе се покаже посилна од артилеријата. Инвеститорите играат игра со висок ризик, верувајќи дека пазарот развил имунитет на барут, но тој имунитет може да се покаже како пуста илузија уште во првите денови од наредната недела.

Сезона на заработики - слабост под површината

Пред нас е клучен период од сезоната на квартални извештаи, а на 22 април „Тесла“ ќе ја започне драмата што ќе ги тестира нервите дури и на најискусните трговци. Вистинската бура следи на 29 и 30 април, кога на сцена излегуваат „Гугл“, „Амазон“, „Мета“, „Мајкрософт“ и „Епл“. Она што моменталната прогноза го најавува е појава на темни облаци - очекувањата укажуваат на јасно забавување на деловната динамика. Кај повеќето технолошки гиганти гледаме пад на приходите во однос на претходниот квартал, што е повеќе од обичен сезонски „мамурлук“ по силниот крај на годината. „Мајкрософт“ единствено се бори против тој тренд со благ раст, но пошироката слика покажува дека моторите на растот почнуваат да застојуваат.

Седумте најголеми технолошки компании кои доминираат со индексот S&P 500 - „Епл“, „Мајкрософт“, „Алфабет“, „Амазон“, „Мета“, „Тесла“ и „Енвидја“ - беа главните носители на растот на пазарот во последниот период, откако на сцена стапи наративот за вештачката интелигенција.

Профитот под притисок- трошоците за ВИ го гризат профитот

Вистинската битка се води „под хаубата“, таму каде што се брои профитот. Додека EБИТДА кај повеќето компании покажува знаци на ладење, „Алфабет“ демонстрира исклучителна оперативна ефикасност и се издвојува од масата.

Кога се анализира нето добивката, сликата станува уште посурова, имајќи предвид дека само „Тесла“ и „Алфабет“ успеваат да задржат позитивен моментум, додека остатокот од секторот покажува загрижувачка слабост во однос на претходниот квартал. Овој дисбаланс е алармантен бидејќи компаниите денес трошат драстично повеќе капитал на инфраструктура за вештачка интелигенција и проширување на капацитетите, а инвеститорите досега го купуваа наративот за неизбежната побарувачка.

Но, каде е таа побарувачка кога приходите бледеат? Пазарот ќе престане да верува во приказната за „раст по секоја цена“ ако кварталните извештаи повторно донесат послаби резултати. Пазарот стана суров и ќе го ускрати секој потрошен долар за инфраструктура, барајќи доказ дека тие инвестиции се претвораат во реален поврат.

Геополитиката како главен фактор 

Оваа корпоративна неизвесност директно се судира со геополитичкиот ѕид. Растот на индексот S&P 500 што го гледавме изминатите денови беше плод на оптимизмот околу двонеделното примирје и дојде како директен резултат на корекцијата на цената на нафтата што следеше по одлуката за примирје, имајќи предвид дека падот на нафтата го изгаси пламенот на стравот дека инфлацијата ќе се претвори во нова стихија што ќе проголта сè пред себе.

Пазарот „полета“ во надеж дека дипломатското решение е на дофат. Сепак, тој оптимизам сега виси на конец. Додека Белата куќа преку изјави на Доналд Трамп сервира наратив за „готова работа“ и потпишување договор во Исламабад, реалноста изгледа драстично поинаку - како опасна покер игра во која никој не сака прв да трепне.

Заканите на Трамп дека ќе „ ги разнесе секоја електрана и мост во Иран“ доколку договор не биде постигнат до среда навечер внесуваат агресивна премија на ризик што берзанските индекси моментално тврдоглаво ја игнорираат. Иако инвеститорите купуваат на гласини за мировен договор, целосно го занемаруваат ризикот дека, ако иранската делегација не се појави или преговорите пропаднат, нафтата повторно ќе скокне, а стравот од ново разгорување на инфлацијата ќе го урне индексот.

Иако САД веќе немаат повеќе стратешки цели за долготрајна ескалација и се насочуваат кон гаѓање „што и да им падне под рака“, самата неизвесност пред истекот на двонеделното примирје е доволна за да предизвика турбуленција. Ова веќе не е прашање само на сезонските резултати на компаниите, туку прашање дали пазарот наскоро ќе сфати дека „мировниот договор“ можеби е само уште една во низата преговарачки тактики на Трамп, а не готова работа.

Bloomberg

 

Следните неколку дена се одлучувачки

Наредниот период ќе ни даде јасна слика - инфлацијата сè уште не успеа значајно да ги сруши резултатите во овој квартал, бидејќи нејзиното влијание не опфати доволно долг период. Затоа, доколку технолошките гиганти успеат да ги надминат веќе намалените, песимистички очекувања и ако воената реторика не се претвори во физички судир, S&P 500 има сила да го продолжи својот бикoвски тренд. Пазарот обожува да ги казнува песимистите, а моменталните ниски проекции на аналитичарите всушност создаваат совршен сцена за позитивен шок што може да го поттурне пазарот понатаму.

Сепак, постои и мрачна страна на равенката. Ако резултатите на компаниите пристигнат млаки, во согласност со овие скромни очекувања или под нив, а притоа бидеме сведоци на ескалација на Блискиот Исток, тогаш ја губиме секоја одбрана. Во такво сценарио, корекцијата не е само веројатна - таа станува неминовна.

Инвеститорите тогаш брзо ќе сфатат дека платиле преголема премија за компании кои го губат замавот, додека геополитичкиот ризик расте. Играта се сведува на тоа дека технолошките гиганти мора да испорачаат ефикасност што сите ја бараат, а светот мора да задржи здив и да избегне нов воен пламен. Кој и да го занемари било кој од овие два фактори - корпоративната профитабилност или геополитичката стабилност - ризикува да остане заробен во погрешна позиција додека расположението на пазарот се менува. Волстрит моментално танцува на работ, а во наредните десет дена ќе се открие дали тоа бил победнички или сепак последен танц.