„Меркадо либре“: Дали „Амазон од Латинска Америка“ е следната голема инвестиција?

Кога инвеститорите бараат алтернатива на „Амазон“ (Amazon) надвор од американскиот пазар, едно име се издвојува, а тоа е „Меркадо либре“ (MercadoLibre). Компанијата од класичен онлајн трговец прерасна во доминантна платформа на Латинска Америка, поврзувајќи е-трговија, логистика, огласување, дигитални плаќања и кредитирање. Најсилни позиции има во Бразил, Мексико и Аргентина, а токму широчината на тој опфат објаснува зошто „Меркадо либре“ го доби прекарот „Амазон на Латинска Америка“.

 

 

Споредбата, сепак, не е целосна. „Амазон“ денес е глобален технолошки гигант чиј профит сè повеќе зависи од АВС (AWS), огласувањето и други бизниси со високи маржи, додека „Меркадо либре“ сè уште во голема мера ја гради својата инфраструктура и го освојува пазарот. Затоа, неговата инвестициска приказна повеќе се фокусира на тоа колку простор за раст сè уште постои во Латинска Америка.

„Меркадо либре“ расте побрзо, но по повисока цена

Најголемиот аргумент во корист на „Меркадо либре“ во моментов е темпото на раст. Компанијата продолжува да ги зголемува приходите значително побрзо од „Амазон“, благодарение на растот на интернет-трговијата, зголемувањето на бројот на корисници и ширењето на финансиските услуги.

 

Таквиот раст е особено значаен бидејќи „Меркадо либре“ не е мала компанија што тргнува од занемарлива база, бидејќи е лидер на повеќе големи пазари во Латинска Америка, но истовремено работи во регион во кој застапеноста на е-трговијата и дигиталните финансиски услуги сè уште заостанува зад развиените економии. Тоа на инвеститорите им го дава она што „Амазон“ денес тешко може да го понуди во иста мера, а се однесува на комбинацијата од голема пазарна позиција и сè уште висок органски раст.

Сепак, овој раст доаѓа со значителни инвестиции. „Меркадо либре“ агресивно инвестира во логистика, бесплатна испорака, картички, кредити, маркетинг и технолошка инфраструктура, што краткорочно врши притисок врз профитабилноста. Сепак, оперативната маржа дава нешто поинаква слика: „Меркадо либре“ на крајот на 2025 година остварувал оперативна маржа од околу 11 отсто, практично на нивото на „Амазон“. Тоа сугерира дека основното работење на компанијата и понатаму останува конкурентно, и покрај големите инвестиции. Поголем притисок во моментов се гледа на нето-ниво, каде што врз резултатот, покрај оперативните трошоци, влијаат и каматните трошоци, даноците и валутните ефекти.

Зошто „Меркадо либре“ не е само копија на „Амазон“

Најголемата грешка би била „Меркадо либре“ да се стави во рамката на набљудување само како латиноамериканска верзија на шопинг-платформата на „Амазон“, со оглед на тоа што неговата клучна предност се наоѓа во Меркадо паго (Mercado Pago).

Финтек-платформата првично беше развиена за да им го олесни плаќањето на корисниците во рамките на купувањето, но со текот на времето стана многу поширок финансиски систем. Денес Меркадо паго овозможува дигитални плаќања, картички, чување пари, инвестициски производи и кредитирање. Во регион во кој голем дел од населението и малите трговци сè уште немаат ист пристап до традиционалното банкарство како потрошувачите во САД или Европа, тоа ѝ дава на компанијата многу поширока улога, бидејќи на тој начин не е насочена само кон тоа да биде место каде што корисникот купува производ туку и платформа преку која корисникот плаќа, прима пари, зема кредит и управува со дел од своите секојдневни финансии.

Bloomberg

 

Токму тоа е големата разлика во однос на „Амазон“. „Амазон“ има посилен бизнис за облак-технологии, додека „Меркадо либре“ има добра интеграција на трговијата и финансиските услуги на пазари на кои таквиот модел дури добива целосна сила и тешко е достапен во традиционална форма.

Систем што самиот се поттикнува

Високиот потенцијал на „Меркадо либре“ произлегува од начинот на кој неговите различни бизниси се дополнуваат меѓусебно. Онлајн трговијата привлекува купувачи и продавачи, логистиката овозможува побрза и посигурна испорака, Меркадо паго го поедноставува плаќањето, додека кредитирањето ги зголемува куповната моќ на корисниците и прометот на продавачите. Тоа создава силен синџир во кој колку повеќе корисникот користи една услуга толку е поголема веројатноста да почне да ги користи и другите.

Тоа создава ефект на замаец, кој е неопходен за долгорочно врзување на клиентите за одреден производ или услуга. Со тоа компанијата се постави како конкурент што не мора само да понуди поевтина стока или подобра апликација, туку наместо тоа гради мрежа на магацини, испорака, база на трговци, систем за плаќање, финансиски лиценци, податоци за корисниците и доверба кај локалното население. Во тоа се крие причината поради која „Меркадо либре“ досега успешно му одолева на притисокот од глобалните конкуренти како „Амазон“, „Шејн“ и „Тему“, иако тие можат да влезат на пазарот со агресивна тактика на намалување на цените, „Меркадо либре“ сепак веќе поседува инфраструктура и односи со корисниците што  постепено се граделе, создавајќи сложен систем.

„Амазон“ е посигурен, „Меркадо либре“ нуди поголем раст

За инвеститор што избира меѓу „Амазон“ и „Меркадо либре“, разликата практично се сведува на прашањето што сака да добие од таа инвестиција. „Амазон“ е многу поголема, попрофитабилна и подиверзифицирана компанија - покрај е-трговијата, инвеститорот добива АВС, огласување и директна изложеност на глобалниот раст на технологии во облак и вештачката интелигенција. „Меркадо либре“, од друга страна, има многу поголем потенцијал за раст на основниот пазар, кој во моментов е атрактивен.

Латинска Америка и понатаму минува низ дигитализација на потрошувачката и финансиските услуги. Ако тој процес продолжи, „Меркадо либре“ се наоѓа во исклучително добра позиција да преземе голем дел од тој раст, бидејќи веќе поседува водечка платформа. Затоа не е необично што пазарот го вреднува „Меркадо либре“ значително поскапо кога се гледа моменталниот и очекуваниот однос меѓу цената и заработката (показателот P/E) јасно покажува дека инвеститорите плаќаат голема премија за „Меркадо либре“ во однос на „Амазон“. Сепак, односот меѓу цената и приходите дава поинаква слика и покажува дека разликата не е толку голема кога се набљудува големината на бизнисот, а не моменталниот профит.

 

 

Зошто акцијата сепак носи поголем ризик

Поголемиот потенцијал за раст доаѓа со очигледно значително поголемиот ризик.

Првиот проблем е токму профитабилноста. „Меркадо либре“ моментално избира раст наместо максимални маржи, но инвеститорите нема неограничено долго да толерираат раст на приходите ако не видат дека тој постепено се претвора во поголем профит. Ако компанијата биде принудена трајно да ја субвенционира испораката, да дава попусти и силно да инвестира само за да го одржи пазарниот удел, денешната вреднувачка процена станува потешко да се оправда.

Вториот ризик произлегува од финтек-бизнисот. Меркадо паго е голема конкурентска предност, но брзиот раст на кредитирањето значи дека компанијата презема сè поголем кредитен ризик. Сè додека квалитетот на портфолиото останува добар, тој бизнис може силно да придонесува за растот - проблемот настанува ако дојде до слабеење на економијата, раст на невработеноста или поголем број корисници што не можат да ги сервисираат обврските.

Третиот ризик е самата Латинска Америка. „Меркадо либре“ работи во економии што можат да бидат значително понестабилни од САД - промените на валутите, инфлацијата, каматните стапки, даночните правила и политичкото опкружување можат брзо да влијаат врз резултатите на компанијата. Слабеењето на бразилскиот реал или аргентинскиот пезос, на пример, може да го намали растот изразен во долари дури и кога локалното работење продолжува да напредува.

Дали „Меркадо либре“ е вистинската алтернатива на „Амазон“ 

Да, но не како едноставно помала верзија на „Амазон“, која е значително поризична. „Амазон“ денес е поквалитетна опција за инвеститор на кого му се поважни постабилната профитабилност, диверзификацијата и изложеноста кон облак-бизнисот и ВИ-инфраструктурата.

„Меркадо либре“ е поинтересен за инвеститор што сака поголема изложеност на растот на е-трговијата и дигиталните финансии на пазар што сè уште не ја достигнал зрелоста на САД - токму затоа неговиот потенцијал може да биде поголем, но и распонот на можните исходи е поширок.

Bloomberg

 

Што треба да се запомни од сето ова

Ако „Меркадо либре“ продолжи да го зголемува бројот на корисници, ја задржи водечката позиција во е-трговијата и успее да го претвори Меркадо пагo во една од доминантните финансиски платформи во Латинска Америка, денешните инвестиции би можеле да се покажат како темел за многу попрофитабилна компанија во иднина.

Ако, сепак, растот бара трајно ниски маржи, агресивни субвенции и сè поголемо преземање кредитен ризик, високата вреднувачка процена остава малку простор за грешка. Затоа „Меркадо либре“ може да се гледа како поагресивна алтернатива на „Амазон“ - компанија со помала сигурност и поголем регионален ризик, но и со значително поголем простор за раст. „Амазон“ веќе е глобален гигант што ја монетизира инфраструктурата што ја изгради во текот на претходните две децении, додека „Меркадо либре“ сè уште е во фаза на проширување, а од тоа колку успешно тој раст ќе го претвори во профит зависи дали прекарот „Амазон на Латинска Америка“ еден ден ќе стане нешто повеќе од само соодветна споредба.